गडचिरोलीतील मत्स्यालयाची उभारणी अत्याधुनिक व आकर्षक पद्धतीने करा
– मत्स्यव्यवसाय मंत्री नितेश राणे
- पर्यटनवाढीला चालना देणारा प्रकल्प गतीने साकारण्याचे निर्देश
मुंबई, दि. १६ : गडचिरोली जिल्ह्यातील सेमाना येथे प्रस्तावित मत्स्यालयाची उभारणी अत्याधुनिक, नाविन्यपूर्ण आणि आकर्षक पद्धतीने करून ते पर्यटकांचे प्रमुख आकर्षण ठरेल, याची विशेष काळजी घ्यावी. पारंपरिक पद्धतीचे मत्स्यालय न उभारता पर्यटकांना वेगळा अनुभव देणाऱ्या संकल्पनेतून या प्रकल्पाची उभारणी करावी. या प्रकल्पामुळे गडचिरोलीच्या पर्यटनाला चालना मिळणार असल्याने त्याच्या उभारणीची कार्यवाही गतीने पूर्ण करावी, असे निर्देश मत्स्यव्यवसाय मंत्री नितेश राणे यांनी दिले.
मंत्री नितेश राणे यांच्या अध्यक्षतेखाली मंत्रालयातील त्यांच्या दालनात गडचिरोली जिल्ह्यातील सेमाना येथे प्रस्तावित मत्स्यालयाच्या उभारणीसंदर्भात आढावा बैठक झाली. यावेळी प्रस्तावित मत्स्यालयाच्या आराखड्याचे आणि संकल्पनेचे सादरीकरण करण्यात आले.
सेमाना येथे सुमारे एक ते सव्वा एकर जागेत हे मत्स्यालय उभारण्याचे प्रस्तावित आहे. या मत्स्यालयात सुमारे ५४ अॅक्रेलिक टाक्या उभारण्यात येणार असून, त्यामध्ये ८८ पेक्षा अधिक प्रजातींचे गोड्या पाण्यातील शोभिवंत मासे ठेवण्यात येणार आहेत. विविध प्रजातींच्या गोड्या पाण्यातील शोभिवंत माशांचा समावेश असलेल्या संकल्पनेवर आधारित या प्रकल्पाचे सादरीकरण आर. आर. मत्स्यालय सल्लागार संस्था यांच्या वतीने करण्यात आले.
No comments:
Post a Comment