वाशीत रंगणार औद्योगिक तंत्रज्ञानाचा महाकुंभ;*

 *वाशीत रंगणार औद्योगिक तंत्रज्ञानाचा महाकुंभ;*

*'बॉइलर इंडिया २०२६' आंतरराष्ट्रीय प्रदर्शनाचे ८ ऑक्टोबरला मुख्यमंत्र्यांच्या हस्ते होणार उद्घाटन!*

ठाणे: उद्योग जगतातील अत्यंत महत्त्वाचा आणि बहुप्रतीक्षित मानला जाणारा ‘बॉइलर इंडिया २०२६’ (Boiler India 2026) हा तीन दिवसीय भव्य आंतरराष्ट्रीय कार्यशाळा, चर्चासत्र व प्रदर्शन सोहळा ८ ते १० ऑक्टोबर २०२६ दरम्यान सिडको प्रदर्शन केंद्र, वाशी, नवी मुंबई येथे आयोजित करण्यात आला आहे.    

     महाराष्ट्र शासनाच्या कामगार विभाग आणि बाष्पके संचालनालयाच्या संयुक्त विद्यमाने बाष्पकांचा सुरक्षित व कार्यक्षम वापर, हिट एक्सचेंजर्स, प्रेशर वेसल्स निर्मितीचे अत्याधुनिक तंत्रज्ञान आणि या क्षेत्रातील रोजगाराच्या संधी या विषयांवर आधारित हा भव्य उपक्रम साकारला जात आहे.

     या आंतरराष्ट्रीय प्रदर्शनाचा भव्य उद्घाटन सोहळा गुरुवार, ८ ऑक्टोबर २०२६ रोजी सकाळी १०:३० वाजता सिडको प्रदर्शन केंद्रात संपन्न होणार आहे. या सोहळ्याचे अध्यक्ष व उद्घाटक म्हणून महाराष्ट्राचे मुख्यमंत्री श्री. देवेंद्र फडणवीस हे उपस्थित राहणार आहेत. तर राज्याचे उपमुख्यमंत्री तसेच नगरविकास, गृहनिर्माण, सार्वजनिक बांधकाम - सार्वजनिक उपक्रम मंत्री व ठाणे जिल्ह्याचे पालकमंत्री एकनाथ शिंदे आणि उपमुख्यमंत्री तसेच राज्य उत्पादन शुल्क, क्रीडा व युवक कल्याण, अल्पसंख्याक विकास व औकाफ मंत्री श्रीमती सुनेत्रा अजित पवार हे मुख्य अतिथी म्हणून या सोहळ्यासाठी उपस्थित राहणार आहेत.

    या संपूर्ण कार्यक्रमाचे स्वागताध्यक्ष कामगार मंत्री ॲड. आकाश फुंडकर हे असतील. उद्घाटन सोहळ्याला राज्य शासनातील विविध विभागांचे मंत्री प्रमुख उपस्थित म्हणून लाभणार आहेत. यामध्ये वनमंत्री गणेश नाईक, परिवहन मंत्री प्रताप सरनाईक, कामगार, वित्त, नियोजन, कृषी, मदत व पुनर्वसन आणि विधी व न्याय राज्यमंत्री ॲड.आशिष जयस्वाल, परशुराम आर्थिक विकास महामंडळाचे अध्यक्ष (मंत्री दर्जा)आशिष दामले आणि नवी मुंबई महानगरपालिकेच्या महापौर श्रीमती सुजाता पाटील यांचा समावेश आहे.

     या राज्यस्तरीय सोहळ्यासाठी लोकप्रतिनिधींची विशेष उपस्थिती असणार आहे. यामध्ये खासदार डॉ.श्रीकांत एकनाथ शिंदे, नरेश गणपत म्हस्के व बाळ्या मामा-सुरेश गोपीनाथ म्हात्रे हे लोकसभा सदस्य उपस्थित राहतील. तर विधानपरिषदेचे आमदार निरंजन डावखरे, रविंद्र फाटक, ज्ञानेश्वर म्हात्रे व श्रीमती माधवी नाईक यांच्यासह विधानसभेचे आमदार डॉ.जितेंद्र आव्हाड, दौलत दरोडा, डॉ.बालाजी किणीकर, महेश चौघुले, रईस शेख, रविंद्र चव्हाण, श्रीमती मंदा म्हात्रे, कुमार आयलानी, नरेंद्र मेहता, राजेश मोरे, किसन कथोरे, संजय केळकर, शांताराम मोरे, विश्वनाथ भोईर आणि श्रीमती सुलभा गायकवाड हे सर्व सन्माननीय अतिथी म्हणून उपस्थित राहणार आहेत.

    प्रशासकीय स्तरावरही या कार्यक्रमासाठी वरिष्ठ प्रशासकीय अधिकारी उपस्थित राहणार असून यामध्ये राज्याचे मुख्य सचिव राजेश अग्रवाल हे प्रमुख उपस्थित म्हणून तर कामगार विभागाच्या अपर मुख्य सचिव श्रीमती आय. ए. कुंदन या स्वागतोत्सुक म्हणून जबाबदारी सांभाळत आहेत. याशिवाय कोकण विभागाच्या विभागीय आयुक्त श्रीमती रुबल अग्रवाल, ठाण्याचे जिल्हाधिकारी डॉ. श्रीकृष्ण पांचाळ, राज्याचे कामगार आयुक्त डॉ.एच. पी. तुम्मोड, असंघटित कामगार विभागाचे विकास आयुक्त श्री. सुशील खोडवेकर , नवी दिल्ली येथील डीपीआयआयटी केंद्रीय बाष्पके मंडळाचे सचिव व तांत्रिक सल्लागार श्री.संदीप कुंभार आणि महाराष्ट्र राज्याचे बाष्पके संचालनालयाचे प्रभारी संचालक श्री. संदीप चिवटे हे विशेष अधिकारी म्हणून या कार्यक्रमाला उपस्थित राहणार आहेत.

      ८ ते १० ऑक्टोबर या तीन दिवसांच्या कालावधीत तांत्रिक आणि औद्योगिक दृष्टीने अत्यंत महत्त्वाच्या विषयांवर सविस्तर चर्चासत्रे आयोजित करण्यात आली आहेत. पहिल्या दिवशी, म्हणजे ८ ऑक्टोबरला ॲडव्हान्स्ड अल्ट्रा सुपर-क्रिटिकल पॉवर प्लांट्स, बायोमास व वेस्ट फ्यूल्सद्वारे डिकार्बोनायझेशन आणि उच्च-कार्यक्षम CFBC बॉइलर तंत्रज्ञान यावर तज्ज्ञ मार्गदर्शन करतील. 

    दुसऱ्या दिवशी, ९ ऑक्टोबर रोजी एआय-आधारित प्रेडिक्टिव्ह मेंटेनन्स, ॲग्रो-वेस्ट ऊर्जा निर्मिती, बायोमास ऊर्जा, वॉटर केमिस्ट्री व्यवस्थापन आणि वेस्ट-टू-एनर्जी तंत्रज्ञानावर भर दिला जाईल. 

     अंतिम दिवशी, १० ऑक्टोबर रोजी नवीन बॉइलर ॲक्ट २०२५ व नवीन नियम, अपघात विश्लेषण व सुरक्षा, ऊर्जा बचत आणि उत्कृष्ट बॉइलर वापरकर्त्यांसाठी 'बेस्ट बॉइलर युझर अवॉर्ड' वितरण सोहळा पार पडेल.

     बाष्पके क्षेत्रातील हे आंतरराष्ट्रीय दर्जाचे प्रदर्शन उद्योग विश्वाला नवी दिशा देणारे ठरणार असून, उद्योगपती, अभियंते, तंत्रज्ञ आणि नागरिकांनी या प्रदर्शनाला मोठ्या संख्येने भेट द्यावी, असे आवाहन बाष्पके संचालनालयाचे प्रभारी संचालक श्री. संदीप चिवटे यांनी केले आहे.

000000000

Gसी एफ आय सामाजिक संस्थेतर्फे १४० विद्यार्थ्यांना ३० लाख रुपयांच्या शिष्यवृत्तीचे वाटप

 सी एफ आय सामाजिक संस्थेतर्फे १४० विद्यार्थ्यांना ३० लाख रुपयांच्या शिष्यवृत्तीचे वाटप

पेण ( राजू मोहिते लक्षवेधी मास मिडिया प्रतिनिधी ) पेण येथील चिल्ड्रन फ्युचर इंडिया या सामाजिक संस्थेच्या वतीने १४० विद्यार्थ्यांना ३० लाख रुपयांच्या शिष्यवृत्तीचे वाटप करण्यात आले. या कार्यक्रमाचे आयोजन सी.एफ.आय. संस्थेच्या पेण येथील नुतन कार्यालयामध्ये करण्यात आले होते.

    चिल्ड्रन फ्युचर इंडिया या सामाजिक संस्थेतर्फे पेण, खालापूर व माणगाव तालुक्यातील गोरगरीब गरजू विद्यार्थ्यांच्या सर्वांगीण विकास व शिक्षणा करिता मदत करण्यात येते. यामध्ये आर्थिक दृष्ट्या दुर्बल तसेच गोरगरीब विद्यार्थ्यांना शिष्यवृत्तीच्या माध्यमातून मदत करण्यात येते. इयत्ता पहिली पासून ते पदवी पर्यंत इंजीनियरिंग डिग्री, डिप्लोमा, एमबीबीएस, बी एम एस, बी एच एम एस, पॅथॉलॉजी, बीएससी, बायोटेक्नॉलॉजी, नर्सिंग, एम एस सी, ए एन एम, जी एन एम, बॅचलर ऑफ अकाउंटिंग इन फायनान्स यासह इतर विविध शैक्षणिक कोर्सेस करण्याकरिता आर्थिक मदत करण्यात येते. संस्थेमार्फत सध्या २२०० विद्यार्थ्यांचे प्रतीपालकत्व घेण्यात आले असून याव्यतिरिक्त इतर सुमारे ५००० गरजू विद्यार्थ्यांना दरवर्षी शैक्षणिक साहित्य, रेनकोट, छत्री, बूट, युनिफॉर्म, वही, पुस्तके, कंपास, पेन व इतर साहित्य देऊन या विद्यार्थ्यांना सहकार्य करीत असल्याचे प्रतिपादन संस्थेचे संचालक तथा मुख्य कार्यकारी अधिकारी डॉ. किशोर देशमुख यांनी याप्रसंगी केले. समाजातील ज्या गोरगरीब होतकरू विद्यार्थ्यांना आर्थिक परिस्थिती नसल्यामुळे शिक्षण घेता येत नाही अशा विद्यार्थ्यांना संस्थेच्या माध्यमातून मदत करण्यात येते. त्यांना त्यांच्या पायावर उभे राहण्याकरीता सहकार्य करण्यात येते. आत्तापर्यंत एक लाखाहून अधिक विद्यार्थ्यांना संस्थेने शैक्षणिक सहकार्य केले असल्याची माहिती संस्थेचे संचालक तथा मुख्य कार्यकारी अधिकारी डॉ. किशोर देशमुख यांनी दिली.

     या कार्यक्रमाला संस्थे मार्फत शिष्यवृत्ती घेऊन शिक्षण पूर्ण करून स्वतःच्या पायावर उभे राहिलेले अनेक डॉक्टर, इंजिनियर व आपापल्या क्षेत्रात उल्लेखनीय काम करणारे माजी विद्यार्थी आले होते. त्यांनी संस्थेने दिलेले सहकार्य व आपले अनुभव यावेळी उपस्थित विद्यार्थ्यांना सांगितले.

        यावेळी जिल्हा व्यावसायिक शिक्षण अधिकारी व ITI अंबरनाथ व ITI उरण येथे प्राचार्य म्हणून कार्यरत राहिलेल्या मारीदास पिल्ले यांनी विद्यार्थ्यांना कौशल्य विकास, शिक्षण आणि उज्ज्वल भविष्यासाठी मार्गदर्शन केले.  या कार्यक्रमाला सी एफ आय चे संचालक तथा मुख्य कार्यकारी अधिकारी डॉ. किशोर देशमुख, पेणच्या नगराध्यक्षा, नगरसेविका, नगरसेवक, प्रतिष्ठित नागरिक, पत्रकार, विद्यार्थी आणि पालकवर्ग मोठ्या संख्येने उपस्थित होते. 

लोणेरे, मुंबई, पुणे, अमरावतीसह राज्यातील संस्थांमध्ये उत्कृष्टता केंद्रे

 लोणेरे, मुंबई, पुणे, अमरावतीसह राज्यातील संस्थांमध्ये उत्कृष्टता केंद्रे

            योजनेअंतर्गत रसायन तंत्रज्ञान संस्था, मुंबई; डॉ. बाबासाहेब आंबेडकर तंत्रशास्त्र विद्यापीठ, लोणेरे; COEP तंत्रज्ञान विद्यापीठ, पुणे; VJTI, मुंबई; शासकीय अभियांत्रिकी महाविद्यालये छत्रपती संभाजीनगर, जळगाव, कराड आणि अमरावती; तसेच श्री गुरुगोविंदसिंहजी अभियांत्रिकी व तंत्रशास्त्र संस्था, नांदेड आदी संस्थांमध्ये विविध क्षेत्रांतील उत्कृष्टता केंद्रांची प्रस्तावित उभारणी करण्यात येणार आहे.

            या केंद्रांमधून पेटंट, स्टार्टअप, उद्योग-सहकार्य, कौशल्य विकास, रोजगारक्षमता आणि तंत्रज्ञानाधारित उत्पादनांना चालना मिळण्याची अपेक्षा आहे. अमरावती येथे AI व Generative AI, रोबोटिक्स व Industry 4.0, सेमीकंडक्टर व VLSI, शाश्वत ऊर्जा व इलेक्ट्रिक मोबिलिटी तसेच स्मार्ट पायाभूत सुविधा अशा क्षेत्रांमध्ये पाच उत्कृष्टता केंद्रे प्रस्तावित आहेत.

            संशोधनाला प्राधान्य, उद्योगाशी थेट जोड, जागतिक संस्थांशी सहकार्य आणि भविष्यातील तंत्रज्ञानासाठी कुशल मनुष्यबळ निर्मिती या बाबींचा समन्वय साधणारी ‘सी.एम. सृष्टी’ योजना महाराष्ट्राच्या उच्च शिक्षण क्षेत्राला नव्या तंत्रज्ञानाधारित दिशेने नेणारी ठरेल असेही उच्च व तंत्र शिक्षण मंत्री चंद्रकातदादा पाटील यांनी यावेळी सांगितले.

शासकीय अभियांत्रिकी महाविद्यालयांचे ‘ट्रान्सफॉर्मेशन’

 शासकीय अभियांत्रिकी महाविद्यालयांचे ‘ट्रान्सफॉर्मेशन’

           राज्यातील निवडक शासकीय अभियांत्रिकी महाविद्यालये आणि तंत्रनिकेतनांचे अत्याधुनिक रूपांतरण करण्यात येणार आहे. Industry 5.0 च्या गरजांशी सुसंगत अभ्यासक्रम, जागतिक दर्जाच्या Best Practices चा स्वीकार आणि राष्ट्रीय तसेच जागतिक क्रमवारीत संस्थांचा दर्जा उंचावण्यावर भर देण्यात येणार आहे.

            संशोधन आणि नवोन्मेष प्रकल्पांना उद्योगांशी जोडण्यासाठी उद्योग क्षेत्राचा सहभाग महत्त्वाचा राहणार आहे. उद्योगांचा आर्थिक सहभाग व्यवहार्य असलेल्या प्रकल्पांमध्ये एकूण प्रकल्प खर्चाच्या किमान २५ टक्के योगदानाची अट ठेवण्यात आली आहे. यामुळे संशोधनाला बाजारपेठेच्या गरजांशी जोडून तंत्रज्ञान हस्तांतरण आणि व्यावसायिक उपयोगाला चालना मिळणार आहे.

            ‘सी.एम. सृष्टी’ योजनेचा कालावधी २०२६-२७ ते २०३०-३१ असा पाच वर्षांचा राहणार आहे. योजनेंतर्गत प्रकल्पाधारित निधी दिला जाणार असून, संबंधित संस्थांना सविस्तर प्रकल्प अहवाल (डीपीआर) सादर करावा लागणार आहे. प्रकल्पाची आवश्यकता, उद्दिष्टे, निधीचा विनियोग, अपेक्षित निष्पन्न आणि प्रकल्पाची शाश्वतता यांचा डीपीआर मध्ये स्पष्ट उल्लेख करणे आवश्यक राहणार आहे.

महाराष्ट्रातील सार्वजनिक विद्यापीठांच्या परिसरात नामांकित परदेशी विद्यापीठांच्या शाखा किंवा कॅम्पस स्थापन

 महाराष्ट्रातील सार्वजनिक विद्यापीठांच्या परिसरात नामांकित परदेशी विद्यापीठांच्या शाखा किंवा कॅम्पस स्थापन करण्यास प्रोत्साहन देण्यात येणार आहे. Dual Degree, Joint Degree, संयुक्त संशोधन, विद्यार्थी-प्राध्यापक देवाणघेवाण आणि अत्याधुनिक संशोधन सुविधा यामुळे राज्यातील उच्च शिक्षण संस्थांची जागतिक स्पर्धात्मकता वाढविण्याचे उद्दिष्ट आहे

            एकाच विद्यापीठाच्या कॅम्पसपुरते शिक्षण मर्यादित न ठेवता अनेक विद्यापीठे, संशोधन संस्था आणि उद्योगांना एका सामायिक शैक्षणिक परिसंस्थेत जोडणाऱ्या Meta University संकल्पनेलाही या योजनेत स्थान देण्यात आले आहे. संसाधनांचे सामायिकीकरण, बहुविषयक शिक्षण, डिजिटल तंत्रज्ञानाचा वापर आणि संशोधन-नवोन्मेषाला चालना देणे, हे या उपक्रमाचे उद्दिष्ट आहे.

एआय पासून क्वांटम आणि सेमीकंडक्टरपर्यंत संशोधनाला बळ

 एआय पासून क्वांटम आणि सेमीकंडक्टरपर्यंत संशोधनाला बळ

            ‘सी.एम. सृष्टी’ अंतर्गत विद्यापीठांमध्ये उत्कृष्टता केंद्रे स्थापन करण्यात येणार आहेत. Deep Tech आणि Frontier Technologies मधील संशोधनाला विशेष प्रोत्साहन देण्यात येणार असून, राष्ट्रीय व आंतरराष्ट्रीय स्तरावरील अग्रगण्य संस्था तसेच उद्योगांच्या मार्गदर्शनाखाली संशोधन करण्यावर भर राहणार आहे. संशोधनातून व्यावसायिक वापरासाठी उपयुक्त तंत्रज्ञान विकसित करण्याचा उद्देश आहे.

            या योजनेत कृत्रिम बुद्धिमत्ता (एआय), मशीन लर्निंग, डेटा सायन्स, रोबोटिक्स, Generative AI, Agentic AI, Digital Twins, क्वांटम तंत्रज्ञान, ड्रोन, 5G/6G, अंतराळ तंत्रज्ञान, प्रगत साहित्य, सेमीकंडक्टर, EV बॅटरी तंत्रज्ञान, हरित हायड्रोजन आणि अक्षय ऊर्जा यांसारख्या भविष्यातील तंत्रज्ञान क्षेत्रांना प्राधान्य देण्यात आले आहे.

            राज्यातील सार्वजनिक विद्यापीठांमध्ये स्वतंत्र School of Technology स्थापन करण्याची तरतूद करण्यात आली आहे. यामध्ये पदव्युत्तर, पीएच.डी. आणि पोस्ट-डॉक्टोरल संशोधनाला प्राधान्य देतानाच Applied आणि Translational Research वर विशेष भर राहणार आहे. Incubation Centres आणि Research Parks यांच्याशी एकात्मता साधून उद्योगांच्या गरजांशी सुसंगत कौशल्य आणि प्रशिक्षण विकसित केले जाणार आहे.

दादर–नवी मुंबई आंतरराष्ट्रीय विमानतळ एसटी बससेवेचा शुभारंभ परिवहन मंत्री प्रताप सरनाईक यांच्या हस्ते सेवेला प्रारंभ; अटलसेतू मार्गे प्रवाशांना थेट कनेक्टिव्हिटी

 दादर–नवी मुंबई आंतरराष्ट्रीय विमानतळ एसटी बससेवेचा शुभारंभ

• परिवहन मंत्री प्रताप सरनाईक यांच्या हस्ते सेवेला प्रारंभ;
• अटलसेतू मार्गे प्रवाशांना थेट कनेक्टिव्हिटी

 

मुंबई, दि. ७  : नवी मुंबई आंतरराष्ट्रीय विमानतळाची मुंबईशी सार्वजनिक वाहतूक कनेक्टिव्हिटी अधिक सक्षम करण्यासाठी महाराष्ट्र राज्य मार्ग परिवहन महामंडळाच्या (एसटी) वतीने सुरू करण्यात आलेल्या दादर–नवी मुंबई आंतरराष्ट्रीय विमानतळ बससेवेचा परिवहन मंत्री तथा एसटी महामंडळाचे अध्यक्ष प्रताप सरनाईक यांच्या शुभहस्ते प्रारंभ झाला. अटलसेतू मार्गे धावणाऱ्या या बससेवेमुळे दादरहून विमानतळापर्यंत प्रवाशांना थेट, सुरक्षित आणि आरामदायी प्रवासाची सुविधा उपलब्ध झाली आहे.

 

यावेळी मंत्री प्रताप सरनाईक म्हणाले, “नवी मुंबई आंतरराष्ट्रीय विमानतळाला एसटीच्या व्यापक सार्वजनिक वाहतूक जाळ्याशी जोडण्याच्या दृष्टीने ही बससेवा महत्वाची आहे. मुंबईतील प्रमुख वाहतूक केंद्र असलेल्या दादरहून थेट विमानतळापर्यंत सेवा सुरू झाल्याने विमानप्रवाशांसह सर्वसामान्य नागरिकांना मोठा फायदा होईल.”

 

विमानतळाची कनेक्टिव्हिटी वाढविण्यासाठी एसटीकडून बोरिवली–नवी मुंबई आंतरराष्ट्रीय विमानतळ आणि स्वारगेट–नवी मुंबई आंतरराष्ट्रीय विमानतळ या बससेवाही सुरू करण्यात आल्या आहेत. मुंबई, नवी मुंबई आणि पुणे या प्रमुख शहरांना विमानतळाशी जोडण्याच्या दृष्टीने या सेवांचा महत्वपूर्ण उपयोग होणार आहे.

 

विमानतळापर्यंत सुरक्षित, सुलभ आणि विश्वासार्ह सार्वजनिक वाहतूक उपलब्ध करून देण्यासाठी एसटी महामंडळाकडून आवश्यकतेनुसार आणखी बससेवा सुरू करण्यात येणार असल्याचेही मंत्री सरनाईक यांनी सांगितले.