ईएसआयसी’च्या लाभ व सेवांच्या व्यापक प्रसारासाठी डिजिटल सुविधा
-कामगार मंत्री ॲड. आकाश फुंडकर
- क्यूआर कोड व माहिती पुस्तिकेचे प्रकाशन
मुंबई, दि. १३ : कर्मचारी राज्य विमा महामंडळाच्या (ईएसआयसी) लाभ व सेवांची माहिती विमाधारकांपर्यंत व्यापकपणे पोहोचविण्यासाठी डिजिटल सुविधा महत्वाच्या ठरणार आहेत, असे कामगार मंत्री ॲड आकाश फुंडकर यांनी सांगितले .
विकसित क्यूआर कोड आणि माहिती पुस्तिकेचे प्रकाशन करताना ते बोलत होते. क्यूआर कोडच्या माध्यमातून विमाधारकांना ईएसआयसीच्या विविध लाभांसह आरोग्य सुविधांची सर्वसमावेशक माहिती उपलब्ध होणार आहे.
कामगार मंत्री ॲड. फुंडकर यांच्या अध्यक्षतेखाली १२ मे २०२५ रोजी झालेल्या बैठकीत क्यूआर कोड आणि एसएमएस सेवेद्वारे माहिती प्रसारित करण्याचे निर्देश देण्यात आले होते. त्यानुसार ईएसआयसीच्या मुंबई प्रादेशिक कार्यालयाने लाभ व सेवांची माहिती असलेल्या माहिती, शिक्षण व संवादविषयक पुस्तिका मुद्रित केल्या आहेत. या पुस्तिकांचे सर्व कर्मचारी राज्य विमा योजना रुग्णालयांमधून वितरण करण्यात येणार आहे.
मुंबई प्रादेशिक कार्यालयाने विकसित केलेल्या क्यूआर कोडमध्ये ईएसआयसीचे लाभ, नियोक्ता व कर्मचारी मार्गदर्शिका, शाखा कार्यालये, डीसीबीओ, दवाखाने, कर्मचारी राज्य विमा रुग्णालये, आयएमपी तसेच संलग्न रुग्णालयांची माहिती समाविष्ट आहे. व्यापक प्रसिद्धीसाठी हा क्यूआर कोड सर्व क्षेत्रीय कार्यालये, महाराष्ट्र ईएसआय सोसायटी तसेच नियोक्ता व कर्मचारी प्रतिनिधींना उपलब्ध करून देण्यात आला आहे.
विमाधारकांशी एसएमएसद्वारे संपर्क साधण्याची कार्यवाही मंजूर राष्ट्रीय धोरण आणि निर्धारित वापरानुसार ईएसआयसी मुख्यालयाकडून केंद्रीय स्तरावर केली जात आहे.
डेटा सामायिकरण करारानंतर १२ जुलै २०२६ रोजीची ४५ लाख ३४ हजार ७३७ विमाधारकांच्या निवासी पत्ते व मोबाईल क्रमांकांची मागविलेली माहिती ईएसआयसीच्या मुंबई प्रादेशिक कार्यालयाने १५ जुलै २०२६ रोजी महाराष्ट्र ईएसआय सोसायटीला उपलब्ध करून दिली आहे.
०००००
