बांबू अर्थव्यवस्थेला चालना देऊन शाश्वत विकास साधावा

 बांबू अर्थव्यवस्थेला चालना देऊन शाश्वत विकास साधावा

 

-राज्यपाल जिष्णु देव वर्मा

 

मुंबई, दि. २७ : बांबूचा वापर केवळ पारंपरिक क्षेत्रापुरता मर्यादित न ठेवता आधुनिक तंत्रज्ञान, संशोधन आणि व्यापारीकरणाच्या माध्यमातून त्याचा विस्तार करणे आवश्यक आहे. प्लास्टिकला पर्याय, रोजगारनिर्मिती आणि पर्यावरण संवर्धनासाठी बांबू महत्त्वाची भूमिका बजावू शकतो. त्यामुळे बांबू उत्पादनासोबतच त्यापासून विविध मूल्यवर्धित उत्पादने निर्माण करण्यावर भर द्यावा, असे प्रतिपादन राज्यपाल जिष्णु देव वर्मा यांनी केले.

 

‘बांबू अर्थव्यवस्था आणि शाश्वतता परिषद २०२६’चे आयोजन मुंबईतील हॉटेल द वेस्टिन, पवई येथे करण्यात आले होते. त्यावेळी ते बोलत होते. जागतिक बांबू दिनाच्या निमित्ताने आयोजित या परिषदेचे उद्घाटन राज्यपाल जिष्णु देव वर्मा यांच्या हस्ते बांबूच्या रोपाला पाणी देऊन आणि दीपप्रज्वलनाने करण्यात आले. परिषदेत दिवसभर विविध चर्चासत्रांचे आयोजन करण्यात आले असून, हवामान बदल, शाश्वत विकास, रोजगारनिर्मिती तसेच बांबू उद्योगातील आर्थिक संधी यावर तज्ज्ञांनी विचार मांडले. या परिषदेस १३ राज्यांतील बांबू उत्पादक शेतकरी, उद्योजक व प्रतिनिधी उपस्थित होते.

 

बांबू हा भारताच्या सामाजिक, सांस्कृतिक आणि आर्थिक जीवनाशी जोडलेला नैसर्गिक स्रोत आहे. बांबूपासून दागिने, कप, सजावटीच्या तसेच घरगुती वापराच्या विविध वस्तू तयार होत आहेत. संशोधन, आधुनिक तंत्रज्ञान आणि व्यापारीकरणाच्या माध्यमातून बांबूला स्वस्त, टिकाऊ आणि सर्वसामान्यांना सहज उपलब्ध पर्याय बनविण्यासाठी प्रयत्न आवश्यक असल्याचे राज्यपालांनी यावेळी सांगितले.

 

हवामान बदलाच्या आव्हानांना सामोरे जाण्यासाठी सौरऊर्जा, पवनऊर्जा आणि हरित हायड्रोजनसोबत बांबूचीही महत्त्वपूर्ण भूमिका राहू शकते. पर्यावरण संरक्षण, आर्थिक विकास आणि सामाजिक प्रगती यांचा समतोल साधणारा शाश्वत विकास ही सामूहिक जबाबदारी आहे, असेही राज्यपालांनी यावेळी नमूद केले.