नायगाव व ना. म. जोशी मार्ग बीडीडी चाळ पुनर्विकास प्रकल्पातील पार्किंग सुविधांबाबत बैठक घेणार
– राज्यमंत्री डॉ. पंकज भोयर
मुंबई, दि. १ : नायगाव आणि ना. म. जोशी मार्ग येथील बीडीडी चाळ पुनर्विकास प्रकल्पातील दोन सदनिकांमागे एक वाहनतळ उपलब्ध करून देण्याचे नियोजन आहे. रहिवासी व लोकप्रतिनिधींच्या मागण्यानुसार पार्किंग सुविधांचा आढावा घेण्यासाठी लवकरच बैठक आयोजित करण्यात येणार असल्याची माहिती राज्यमंत्री डॉ. पंकज भोयर यांनी दिली.
विधानपरिषदेत नियम ९३ अंतर्गत सदस्य सुनील शिंदे यांनी उपस्थित केलेल्या सूचनेवर उत्तर देताना ते बोलत होते. यावेळी सदस्य अनिल परब, प्रविण दरेकर, प्रमोद जठार, प्रसाद लाड यांनी चर्चेत सहभाग घेतला.
राज्यमंत्री डॉ. भोयर म्हणाले की, बीडीडी चाळ पुनर्विकास प्रकल्प दोन टप्प्यांत राबविण्यात येत असून पुनर्वसन काम सुरू असून, दुसऱ्या टप्प्यातील उर्वरित पुनर्वसन इमारतींपैकी चार इमारतींचे बांधकाम प्रगतीपथावर आहे. नायगाव येथे पहिल्या टप्प्यातील एकूण १,४०१ पुनर्वसन सदनिकांचे वाटप करण्याची प्रक्रियाही सुरू झाली आहे.
ते म्हणाले की, विकास नियंत्रण व प्रोत्साहन नियमावली (डीसीपीआर-२०३४) नुसार प्रत्येक सदनिकेमागे वाहनतळ देण्याची तरतूद आहे. वरळी, नायगाव आणि ना. म. जोशी मार्ग या तिन्ही बीडीडी पुनर्विकास प्रकल्पांमध्ये याचे नियोजन करण्यात आले आहे.
राज्यमंत्री डॉ. भोयर यांनी स्पष्ट केले की, वरळी प्रकल्पात उपलब्ध जागेमुळे अधिक वाहनतळाची व्यवस्था करणे शक्य झाले आहे. मात्र, नायगाव आणि ना. म. जोशी मार्ग येथे जागेची मर्यादा असल्याने दोन कुटुंबांमागे एक वाहनतळ अशी व्यवस्था करण्यात आली आहे.
प्रभादेवीसह विविध पुनर्विकास प्रकल्पांमध्ये पार्किंग सुविधांबाबत लोकप्रतिनिधींनी व्यक्त केलेल्या सूचनांची दखल घेतली जाईल. ज्या ठिकाणी अतिरिक्त पार्किंगची सुविधा उपलब्ध करून देणे शक्य असेल, त्या ठिकाणी त्याबाबत सकारात्मक निर्णय घेण्यासाठी पाहणी करण्यात येईल, असेही त्यांनी सांगितले.
तसेच, सदस्यांनी उपस्थित केलेल्या दुचाकी वाहनांच्या पार्किंगच्या प्रश्नाबाबत मुख्यमंत्री यांनी सूचना दिल्यास त्याची तपासणी करून आवश्यक ती कार्यवाही करण्यात येईल. चारचाकी वाहनांप्रमाणेच दुचाकींसाठीही योग्य पार्किंग सुविधा उपलब्ध करून देण्याबाबत विभाग स्तरावर प्रक्रिया राबविण्यात येईल, असे डॉ. भोयर यांनी सांगितले.
No comments:
Post a Comment