प्रोजेक्ट महा-देवा’ राज्यस्तरीय स्काऊटिंग अंतिम फेरीचे उद्घाटन
· राज्यात फुटबॉलचा पाया मजबूत करण्याच्या उद्दिष्टाने महा-देवा महत्वपूर्ण प्रकल्प
मुंबई, दि. २८ : क्रीडा विभागातर्फे ‘प्रोजेक्ट महा-देवा’च्या राज्यस्तरीय स्काऊटिंग अंतिम फेरीचे उद्घाटन मित्रा चे मुख्य कार्यकारी अधिकारी प्रविण परदेशी यांच्या प्रमुख उपस्थितीत कुपरेज फुटबॉल मैदान येथे करण्यात आले. महाराष्ट्रात फुटबॉलचा पाया मजबूत करण्याच्या उद्दिष्टाने सुरू झालेल्या या प्रकल्पाच्या महत्त्वपूर्ण टप्प्याची शुक्रवारी औपचारिक सुरुवात झाली.
मुख्यमंत्री देवेंद्र फडणवीस यांच्या नेतृत्वाखाली राज्यातील, विशेषतः ग्रामीण भागातील फुटबॉलचा विकास साधण्यासाठी ‘प्रोजेक्ट महा-देवा’ची अंमलबजावणी करण्यात येत आहे. राज्यातील प्रतिभावान खेळाडू शोधणे, त्यांना प्रशिक्षण, मार्गदर्शन आणि प्रगतीसाठी आवश्यक पाठबळ देणे हे प्रकल्पाचे मुख्य ध्येय आहे. ग्रामपातळीवर सुरू झालेल्या निवड प्रक्रियेतून राज्यातील 120 प्रतिभावान फुटबॉलपटूंनी प्रोजेक्ट महा-देवाच्या अंतिम राज्यस्तरीय चाचणीपर्यंत मजल मारली आहे. या प्रक्रियेतून राज्यातील सर्वोत्तम 30 मुले आणि 30 मुली निवडण्याची अंतिम फेरी आता पार पडत आहे.
निवडलेल्या 60 फुटबॉलपटूंना महाराष्ट्र सरकारतर्फे पाच वर्षांची विशेष शिष्यवृत्ती प्रदान केली जाणार आहे. तसेच या तरुणांना 14 डिसेंबर रोजी जगप्रसिद्ध फुटबॉलपटू लिओनेल मेस्सी यांच्याकडून प्रशिक्षणाची संधी उपलब्ध होणार आहे.
.
भारत 2034 फिफा वर्ल्ड कपसाठी पात्र ठरेल, तेव्हा राष्ट्रीय संघात किमान पाच खेळाडू महाराष्ट्रातील असावेत, या दृष्टीने राज्य सरकार आणि क्रीडा विभाग विशेष प्रयत्नशील आहेत. क्रीडा विभाग, मित्रा, विफा, विएसटीएफ आणि अन्य संस्थांच्या सहकार्याने ‘प्रोजेक्ट महा-देवा’ महाराष्ट्रातील फुटबॉलप्रेमी तरुणांना जागतिक दर्जाचे व्यासपीठ उपलब्ध करून देणारा निर्णायक उपक्रम ठरत असल्याची माहिती यावेळी देण्यात आली.
No comments:
Post a Comment