सांगली येथे विद्यार्थी विभागाचे ६५ वे राज्य कला प्रदर्शन

 सांगली येथे विद्यार्थी विभागाचे ६५ वे राज्य कला प्रदर्शन 

-उच्च व तंत्र शिक्षण मंत्री चंद्रकांतदादा पाटील

 

मुंबई, दि. २५ : कला संचालनालयाकडून दरवर्षी महाराष्ट्र राज्य कला प्रदर्शन आयोजित करण्यात येते. राज्य कला प्रदर्शन कलाकार विभाग व विद्यार्थी विभाग अशा दोन विभागात स्वतंत्रपणे आयोजित करण्यात येते. विद्यार्थी विभागाचे प्रदर्शन यावर्षी सांगली येथे फेब्रुवारी 2026 मध्ये तर कलाकार विभागाचे राज्य कला प्रदर्शन जहांगीर आर्ट गॅलरी, मुंबई येथे 10 ते 16 मार्च 2026 या कालावधीत आयोजित करण्यात येणार आहे. असे उच्च व तंत्र शिक्षण मंत्री चंद्रकांतदादा पाटील यांनी सांगितले.

 

उच्च व तंत्र शिक्षण मंत्री चंद्रकांतदादा पाटील यांच्या अध्यक्षतेखाली राज्यातील शासनमान्य अशासकीय 19 अनुदानित कला महाविद्यालयांच्या प्राचार्यांची बैठक मंत्रालयात झाली. त्यावेळी या आयोजनास मान्यता देण्यात आली. कला शिक्षणाच्या सर्वांगीण विकासासंदर्भात विविध  मुद्यांवर या बैठकीत सविस्तर चर्चा करण्यात झाली.

 

उच्च्‍ व तंत्र शिक्षण मंत्री चंद्रकांतदादा पाटील म्हणाले,  राज्यातील विद्यार्थी व कलाकार यांच्या अंगी असलेल्या कलागुणांना प्रोत्साहन देण्यासाठी, त्यांच्या प्रतिभाशक्तीला हक्काचे व्यासपीठ उपलब्ध करून देण्यासाठी कला संचालनालयाकडून दरवर्षी महाराष्ट्र राज्य कला प्रदर्शन आयोजित करण्यात येते. दरवर्षी राज्यात  विविध जिल्ह्यांतील विद्यार्थ्यांना संधी मिळावी आणि कला संस्कृतीचा प्रसार व्हावा यासाठी  महाराष्ट्रातील एका जिल्ह्यात हे प्रदर्शन आयोजित केले जाते. यावर्षी विद्यार्थी विभागाचे राज्य कला प्रदर्शन सांगली येथे  फेब्रुवारी 2026 मध्ये होणार असून राज्यभरातील विद्यार्थ्यांच्या उत्कृष्ट कलाकृती सांगलीकरांसाठी उपलब्ध असणार आहेत. असेही मंत्री चंद्रकांतदादा पाटील यांनी यावेळी सांगितले.

 राज्य कला प्रदर्शनांतर्गत दिल्या जाणाऱ्या पुरस्कार व गौरव मानधनाच्या रकमेत दर पाच वर्षांनी पाच टक्के वाढ करण्यास बैठकीत मान्यता देण्यात आली. यामुळे कलाकार व विद्यार्थ्यांना अधिक प्रोत्साहन मिळणार असल्याची माहिती यावेळी देण्यात आली.

 

राज्यातील कला शिक्षण क्षेत्राच्या सर्वांगीण विकासासाठी आणि  नवीन राष्ट्रीय शैक्षणिक धोरणाच्या अनुषंगाने कला शिक्षणाची पुनर्रचना, राज्यात स्वतंत्र ललित कला विद्यापीठ स्थापन करणे या संदर्भातही यावेळी चर्चा करण्यात आली.