चेक प्रजासत्ताकातील कंपन्यांनी महाराष्ट्रात गुंतवणूक आणि उत्पादन क्षेत्रात भागीदारी करावी

 चेक प्रजासत्ताकातील कंपन्यांनी महाराष्ट्रात गुंतवणूक आणि उत्पादन क्षेत्रात भागीदारी करावी

–राजशिष्टाचार मंत्री जयकुमार रावल

 

चेक प्रजासत्ताक आणि महाराष्ट्रातील औद्योगिक सहकार्य, आधुनिक तंत्रज्ञान व गुंतवणुकीच्या संधींवर भर

 

            मुंबई, दि. १५ : चेक प्रजासत्ताकातील कंपन्यांनी केवळ भारतीय बाजारपेठेत उत्पादने विकण्यापुरते मर्यादित न राहता महाराष्ट्रात उत्पादन प्रकल्प उभारावेत, गुंतवणूक करावी आणि तंत्रज्ञानाच्या देवाणघेवाणीतून दीर्घकालीन भागीदारी विकसित करावी, असे आवाहन राजशिष्टाचार मंत्री जयकुमार रावल यांनी केले.

 

            ‘सीआयआय’च्या वतीने चेक प्रजासत्ताकाचे उपपंतप्रधान व व्यापारमंत्री कारेल हॅवलिक यांच्या उपस्थितीत भारतीय आणि चेक प्रजासत्ताकातील उद्योग प्रतिनिधींच्या बैठकीचे आयोजन हॉटेल ताज प्रेसिडेंट येथे करण्यात आले होते. या कार्यक्रमात मंत्री रावल बोलत होते.

 

            मंत्री रावल म्हणाले की, चेक प्रजासत्ताकाची अभियांत्रिकी, वाहननिर्मिती, अवकाश उद्योग, आधुनिक यंत्रसामग्री, रोबोटिक्स आणि वैज्ञानिक संशोधनातील क्षमता, तसेच महाराष्ट्रातील कुशल मनुष्यबळ आणि पायाभूत सुविधांची उपलब्धता यांची सांगड घातल्यास दोन्ही देशांमधील औद्योगिक सहकार्याला मोठी चालना मिळू शकेल. मुख्यमंत्री देवेंद्र फडणवीस यांच्या नेतृत्वाखाली महाराष्ट्र देशाच्या आर्थिक विकासातील महत्त्वाचे योगदान देणारे राज्य म्हणून पुढे आले आहे. देशाच्या सकल देशांतर्गत उत्पादनात महाराष्ट्राचा सुमारे ४० टक्के वाटा असून, २०२४-२५ मध्ये देशातील एकूण थेट परकीय गुंतवणुकीच्या सुमारे ३९ टक्के गुंतवणूक महाराष्ट्रात आल्याचे त्यांनी सांगितले.

 

            मुंबई हे देशाचे आर्थिक आणि व्यावसायिक केंद्र, पुणे हे वाहननिर्मिती, अभियांत्रिकी आणि तंत्रज्ञानाचे प्रमुख केंद्र, तर नाशिक हे उत्पादन, अवकाश उद्योग आणि कृषी क्षेत्रातील संधींसाठी महत्त्वाचे ठिकाण आहे. याचबरोबर छत्रपती संभाजीनगरसह राज्यातील अन्य औद्योगिक केंद्रांमध्येही उत्पादन क्षेत्राचा विस्तार होत आहे. या औद्योगिक क्षमतेचा लाभ चेक प्रजासत्ताकातील कंपन्यांनी घ्यावा, असे आवाहन त्यांनी केले.