गावच्या यात्रा-उत्सव ही महाराष्ट्राची सांस्कृतिक ओळख
- सांस्कृतिक कार्यमंत्री ॲड. आशिष शेलार
मुंबई, दि. ९ : गावोगावी साजऱ्या होणाऱ्या यात्रा आणि उत्सव हे केवळ धार्मिक किंवा मनोरंजनाचे कार्यक्रम नसून, ते महाराष्ट्राच्या समृद्ध सांस्कृतिक परंपरेचे, सामाजिक एकतेचे आणि ग्रामीण अर्थव्यवस्थेचे महत्त्वाचे आधारस्तंभ आहेत. गावातील देवदेवता, लोककला, नृत्य, संगीत, परंपरा आणि सामूहिक सहभाग यांमधून ग्रामीण समाजाचे सांस्कृतिक जीवन समृद्ध होत असते. या परंपरांचे जतन करतानाच गावांचा सर्वांगीण विकास आणि आधुनिक व्यवस्थांचे बळकटीकरण करणे आवश्यक आहे, असे प्रतिपादन राज्याचे सांस्कृतिक कार्यमंत्री ॲड. आशिष शेलार यांनी केले.
महाराष्ट्र शासनाच्या सांस्कृतिक कार्य विभागाच्या दर्शनिका विभागामार्फत प्रकाशित करण्यात आलेल्या ‘राज्य गॅझेटिअर’मधील ‘यात्रा व उत्सव : कोकण विभाग’, ‘यात्रा व उत्सव : पश्चिम महाराष्ट्र’ आणि ‘वैदिक जलविज्ञान’ या ग्रंथांच्या प्रकाशन सोहळ्यानिमित्त ते बोलत होते. या ग्रंथांचे प्रकाशन ॲड. आशिष शेलार यांच्या हस्ते करण्यात आले.
गावातील यात्रा आणि उत्सव हे त्या गावाच्या सांस्कृतिक ओळखीचे अविभाज्य अंग असतात. या उत्सवांमधून पारंपरिक कला, नृत्य, संगीत आणि लोकजीवनाचे विविध पैलू पुढील पिढीपर्यंत पोहोचतात. यात्रांच्या माध्यमातून गावातील नागरिक एकत्र येतात, सामाजिक संबंध दृढ होतात आणि सामूहिक सहभागाची भावना वाढीस लागते. या परंपरांचे दस्तऐवजीकरण आणि अभ्यास झाल्यास महाराष्ट्राच्या सांस्कृतिक वारशाचे जतन अधिक प्रभावीपणे करता येईल, असेही त्यांनी नमूद केले.
यात्रा-उत्सवांचा संबंध केवळ श्रद्धा आणि परंपरेपुरता मर्यादित नसून, त्यातून स्थानिक कलाकार, कारागीर, लघुव्यावसायिक आणि विविध सेवा पुरविणाऱ्यांना रोजगाराच्या संधी उपलब्ध होतात. त्यामुळे ग्रामीण अर्थव्यवस्थेलाही चालना मिळते. स्थानिक कला आणि कलाकृतींना प्रोत्साहन देत या परंपरांचे संवर्धन करणे ही काळाची गरज आहे, असे मत त्यांनी व्यक्त केले.
No comments:
Post a Comment