जम्मू येथे ‘लोककलेतील श्रीगणेश’मधून महाराष्ट्राच्या सांस्कृतिक वैभवाचा जागर
जम्मू येथे महाराष्ट्राच्या लोककला, शास्त्रीय नृत्य आणि गायनाची सुरेल मैफिल
मुंबई, दि. 19 : गणेशोत्सवाला राज्य महोत्सवाचा दर्जा मिळाल्याने महाराष्ट्राची समृद्ध लोककला, शास्त्रीय कला आणि सांस्कृतिक परंपरा देशाच्या विविध भागांत पोहोचविण्याच्या उद्देशाने महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालयाच्या वतीने आयोजित ‘लोककलेतील श्रीगणेश’ या विशेष सांस्कृतिक कार्यक्रमाला जम्मू येथे उत्स्फूर्त प्रतिसाद मिळाला.
पद्मश्री पद्मा सचदेव गव्हर्नमेंट कॉलेज ऑडिटोरियम, गांधीनगर, जम्मू येथे शुक्रवारी (दि.18) झालेल्या या कार्यक्रमात महाराष्ट्राच्या विविध लोककला, शास्त्रीय नृत्य आणि गायनाचे मनोहारी सादरीकरण करण्यात आले. गणेशभक्ती, महाराष्ट्राची लोकपरंपरा आणि विविध कलाविष्कार यांचा सुरेल संगम या कार्यक्रमातून अनुभवायला मिळाला.
‘गणपती बाप्पा मोरया... मंगलमूर्ती मोरया...’ या भक्तिमय जयघोषाने कार्यक्रमस्थळी उत्साहाचे वातावरण निर्माण झाले. महाराष्ट्रातील लोककला आणि शास्त्रीय कलापरंपरेचे सादरीकरण जम्मूतील रसिकांसमोर झाल्याने महाराष्ट्राच्या सांस्कृतिक वैभवाची ओळख व्यापक स्तरावर पोहोचविण्याच्या उद्देशाला या कार्यक्रमातून बळ मिळाले.
No comments:
Post a Comment