नाशिक व कोकण विभागात २९ सप्टेंबरला
‘पंडित दीनदयाळ उपाध्याय रोजगार महाकुंभ - महाराष्ट्र’
· मुख्यमंत्र्यांच्या हस्ते होणार उद्घाटन
· नाशिक-कोकण विभागातील सर्व जिल्ह्यांत ४१८ हून अधिक ठिकाणी रोजगार मेळावे
· दीड हजारांहून अधिक कंपन्या व नियोक्त्यांचा सहभाग
· १ लाखांपेक्षा अधिक उमेदवारांची नोंदणी, २५ हजारांहून अधिक रोजगार संधी उपलब्ध
मुंबई, दि. २४ : कौशल्य, रोजगार, उद्योजकता व नाविन्यता विभागाच्या वतीने २९ सप्टेंबर रोजी ‘पंडित दीनदयाळ उपाध्याय रोजगार महाकुंभ मेळावा’ या रोजगार उपक्रमाचे आयोजन करण्यात आले आहे. पंडित दीनदयाळ उपाध्याय 'रोजगार महाकुंभ' मेळावे निवडणुक आचारसंहिता लागू झाल्यामुळे टप्प्याटप्प्याने आयोजित करण्यात येणार आहेत. त्यानुसार, पहिल्या टप्प्यात नाशिक आणि कोकण विभागातील रोजगार मेळावे आयोजित करण्यात येत आहेत.मुख्यमंत्री देवेंद्र फडणवीस यांच्या हस्ते मुंबईतील एसएनडीटी महिला विद्यापीठात महिलांसाठी विशेष रोजगार मेळाव्याचे उद्घाटन २९ सप्टेंबर २०२६ रोजी सकाळी १०.३० वाजता होणार आहे.
No comments:
Post a Comment