बाह्यस्त्रोत सेवा संस्थांनी दर्जेदार सुविधा द्याव्यात

 बाह्यस्त्रोत सेवा संस्थांनी दर्जेदार सुविधा द्याव्यात

–सार्वजनिक आरोग्यमंत्री प्रकाश आबिटकर

 

मुंबई, दि. १८: आरोग्य विभागात बाह्य स्त्रोतांमार्फत (आऊटसोर्सिंगद्वारे) सेवा देणाऱ्या संस्थांच्या कामकाजात कोणताही गैरप्रकार आढळल्यास त्यांच्यावर कडक कारवाई करण्याचे, प्रसंगी काळ्या यादीत (ब्लॅक लिस्ट) टाकण्याचे निर्देश सार्वजनिक आरोग्यमंत्री प्रकाश आबिटकर यांनी दिले.

 

            सार्वजनिक आरोग्य विभागात सिटीस्कॅन, एमआरआय, डायलेसिस, स्टेमी, एक्स रे, रक्त तपासण्या (एचएसएल), आपत्कालीन वैद्यकीय सेवा १०८, १०२, १०८, मनुष्यबळ पुरवठा, आहार पुरवठा, स्वच्छता सेवा, तांत्रिक सहाय्य, देखभाल-दुरुस्ती,वाहन पुरवठा यासारख्या अनेक सेवा बाह्य (खासगी) यंत्रणेद्वारे दिल्या जातात. बाह्य स्त्रोतांद्वारे संलग्नित संस्थांनी कर्मचाऱ्यांना नियमाप्रमाणे वेतन दिले पाहिजे, रुग्णांना सकस आहारपुरवठा, स्वछता सेवा,यासह सर्व नियमांचे काटेकोर पालन होत असल्याबाबत जिल्हास्तरीय अधिकाऱ्यांनी तपासणी करावी. पंधरा दिवसात त्याबाबतच्या अहवाल सादर करावा. अहवालात दोषी आढळल्यास संबंधित संस्थांची बिले थांबवावीत. तसेच त्यांवर कडक कारवाई करण्याचे निर्देश आरोग्य मंत्री प्रकाश आबिटकर यांनी दिले.