समान नागरी संहितेबाबत सूचना व अभिप्राय १५ नोव्हेंबर पर्यंत
सादर करण्याचे नागरिकांना आवाहन
- नागरिकांच्या सहभागासाठी विशेष वेब पोर्टलचा शुभारंभ
मुंबई, दि. १५ : राज्यातील नागरिकांनी समान नागरी संहितेबाबत आपल्या सूचना व अभिप्राय १५ नोव्हेंबर २०२६ पर्यंत वेब पोर्टल, ई-मेल किंवा टपालाद्वारे सादर करावेत, असे आवाहन समान नागरी संहिता समितीने केले आहे.
नागरिकांना सूचना व अभिप्राय सादर करता यावेत, यासाठी विशेष वेब पोर्टल विकसित करण्यात आले आहे. समितीच्या अध्यक्षा तथा सर्वोच्च न्यायालयाच्या माजी न्यायमूर्ती रंजना देसाई यांच्याहस्ते या पोर्टलचा दूरदृष्य संवाद प्रणाली द्वारे शुभारंभ करण्यात आला.
समान नागरी संहितेच्या घटनात्मक, कायदेशीर, सामाजिक, सांस्कृतिक आणि प्रशासकीय पैलूंचा समिती सखोल अभ्यास करणार आहे. राज्यातील विविध धर्म, परंपरा, सामाजिक संरचना, सांस्कृतिक वैशिष्ट्ये, महिलांचे अधिकार, लैंगिक समानता आणि सर्व नागरिकांना समान न्याय या बाबींचा वस्तुनिष्ठपणे विचार केला जाणार आहे.
नागरिकांनी सूचना व अभिप्राय https://ucc.maharashtra.gov.in/ या वेब पोर्टलवर किंवा ucc@maharashtra.gov.in या ई-मेलवर पाठवावेत. टपालाद्वारे समान नागरी संहिता समिती महाराष्ट्र कार्यालय, दुसरा मजला, जुने कस्टम हाऊस, शहीद भगतसिंग रोड, फोर्ट, मुंबई, महाराष्ट्र–४००००१ या पत्त्यावर पाठविण्यात याव्यात, असे आवाहनही करण्यात आले आहे.
समिती इतर राज्यांतील समान नागरी संहितेशी संबंधित कायदे, नियम, अंमलबजावणीची प्रक्रिया, अनुभव आणि अडचणींचाही अभ्यास करणार आहे. विवाह, घटस्फोट, वारसाहक्क, उत्तराधिकार आणि अन्य वैयक्तिक कायद्यांचे परीक्षण करून आवश्यक शिफारशी शासनाला सादर करणार आहे. समितीकडून संभाव्य अंमलबजावणीमुळे उद्भवणाऱ्या सामाजिक, आर्थिक, प्रशासकीय आणि कायदेशीर परिणामांचे मूल्यमापन करून आवश्यक कायदेशीर, प्रशासकीय व संस्थात्मक उपाययोजनाही सुचविण्यात येणार आहेत.
विविध धार्मिक प्रतिनिधी, कायदेतज्ज्ञ, राजकीय, सामाजिक व स्वयंसेवी संस्था, महिला संघटना, शैक्षणिक संस्था, तज्ज्ञ आणि सर्वसामान्य नागरिकांचे विचार समिती जाणून घेणार आहे. विविध पैलूंवर सार्वजनिक सल्लामसलत आणि जनसुनावणीही आयोजित करण्यात येणार आहे, असे समितीच्या प्रसिद्धी पत्रकात नमूद करण्यात आले आहे.
