समृद्धी महामार्गालगत सनदी अधिकाऱ्यांच्या

नातेवाईकांनी जमिनी विकत घेतल्याच्या माहितीमध्ये तथ्य नाही

- नगरविकास मंत्री एकनाथ शिंदे

            नागपूर मुंबई समृद्धी महामार्ग हा राज्याच्या दृष्टीने अतिशय महत्वाचा प्रकल्प आहे. यामार्गालगत उद्योग, रोजगार वाढून समृद्धी निर्माण होणार आहे. या मार्गालगत काही सनदी अधिकाऱ्यांच्या नातेवाईकांनी जमिनी घेतल्याच्या माहितीची कोकण विभागीय आयुक्त तसेच लोकायुक्तांनी सविस्तर चौकशी केली असून यामध्ये तथ्य आढळून आले नाही, असे नगरविकास मंत्री एकनाथ शिंदे यांनी सांगितले.

            विधानसभा सदस्य पृथ्वीराज चव्हाण यांनी यासंबंधी अर्धा तास चर्चा उपस्थित केली होती. त्यावेळी श्री.शिंदे यांनी ही माहिती दिली. या मार्गालगत जमिनींचे दर रेडीरेकनर नुसार ठरविण्यात आले आहेत. यामध्ये कुठे कमी दर दिल्याचे उदाहरण समोर आल्यास त्याबाबत बैठक घेऊन चौकशी करण्यात येईल, असेही त्यांनी एका उपप्रश्नाच्या उत्तरात सांगितले.

०००००