पुणे येथील भिडेवाडा शाळेच्या जागी

क्रांतीज्योती सावित्रीबाई फुले यांचे स्मारक उभारण्यासाठी शासन प्रयत्नशील

-नगरविकास मंत्री एकनाथ शिंदे

            मुंबई, दि. 24- पुणे येथील क्रांतीज्योती सावित्रीबाई फुले आणि महात्मा ज्योतीराव फुले यांनी सुरू केलेल्या भिडेवाडा शाळेची इमारत मोडकळीस आली आहे. या जागेचे प्रकरण न्यायालयात असून त्यावर तोडगा काढून या जागी पुन्हा शाळा सुरू करून स्मारक व्हावे, यासाठी लवकरच बैठक आयोजित करण्यात येईल आणि स्मारकाच्या कामासाठी नगरविकास विभागामार्फत निधी उपलब्ध करून दिला जाईल असे नगरविकास मंत्री एकनाथ शिंदे यांनी सांगितले.

            विधानसभा सदस्य सुधीर मुनगंटीवार यांनी यासंबंधी अर्धा तास चर्चा उपस्थित केली होती. त्याला उत्तर देताना श्री शिंदे बोलत होते. हा विषय सर्वांच्या दृष्टीने अत्यंत महत्त्वाचा आहे. हे स्मारक व्हावे हे सर्वांचेच मत आहे. त्यामुळे याबाबत पाठपुरावा करण्यात येईल, असेही श्री शिंदे यांनी सांगितले.

00000