डॉ रविंद्र कुमार सिंगल यांच्या सायकल शर्यतीतील

अनुभवावर आधारित पुस्तकाचे प्रकाशन

 

          मुंबई दि. 20 : वैधमापन शास्त्र नियंत्रक डॉ रविंद्र सिंगल यांच्या सायकल शर्यतीवरील अनुभवांचे संकलन असलेल्या ‘पेडलिंग जर्नी : डेक्कन क्लिफहँगर’ पुस्तकाचे प्रकाशन मुख्यमंत्री उद्धव ठाकरे यांच्या हस्ते वर्षा येथे करण्यात आले.

            डॉ सिंगल यांनी २०१७ मध्ये पुणे ते गोवा डेक्कन क्लिफ हँगर या ६४३ किलोमीटरच्या सायकलींगच्या शर्यतीमध्ये भाग घेतला होता. ही शर्यत ही अतिशय खडतर होती तसेच विशिष्ट कालमर्यादेत ती पुर्ण करणे अतिशय आवश्यक होते. त्याकरिता मानसिक व शारिरीक तंदुरुस्ती, तसेच सराव क्रमप्राप्त होता. याकरिता डॉ सिंगल यांनी ६ महिने प्रशिक्षण घेतले.

            त्यांनी ४ नोव्हेंबर, २०१७ रोजी प्रत्यक्षात शर्यतीत भाग घेतला. त्यांच्याबरोबर इतर काही प्रतिस्पर्धी होते, परंतु मानसिक व शारिरीक थकव्यामुळे काहींना सदरील शर्यत मध्येच सोडून दिली. तथापि, डॉ सिंगल यांनी  मानसिक इच्छाशक्तीच्या जोरावर शर्यत वयाच्या पन्नाशीतही त्यांनी पूर्ण केली.

            शर्यतीचा ६४३ किलोमीटरचा सायकलवरील खडतर प्रवास करताना शारिरीक व मानसिक क्षमतांचा पूर्ण कस लागला तो  प्रवास तरुणांचे  मनोधैर्य व मनोबल उंचावण्याकरिता नक्कीच प्रेरणादायी ठरावा म्हणून डॉ.सिंगल यांनी हे पुस्तक लिहिले. डॉ.वैशाली बालाजीवाले या पुस्तकाच्या सह लेखिका आहेत.

            पुस्तक प्रकाशन प्रसंगी कामगार विभागाच्या प्रधान सचिव विनिता वेद सिंगल देखील उपस्थित होत्या.

००००