आधुनिक ड्रोन शेती कृषी महोत्सवाचे आकर्षण

 आधुनिक ड्रोन शेती कृषी महोत्सवाचे आकर्षण

 * बीडच्या मराठमोळ्या खाद्यसंस्कृतीचा कृषी प्रदर्शनात तडका; खवय्यांना बचतगटांच्या गावरान जेवणाचीही मेजवानी

* आज दुपारी मान्यवरांच्या हस्ते उद्घाटन

बीड प्रतिनिधी : छत्रपती संभाजी महाराज मल्टिपर्पज ग्राउंडवर पार पडणाऱ्या पाच दिवशीय बीड जिल्हा कृषी महोत्सवात शेतकऱ्यांसाठी आधुनिक ड्रोन शेतीचे तंत्रज्ञान आणि प्रात्यक्षिक पाहावयाला मिळणार आहे. त्याचबरोबर बीडच्या विशेष खाद्य संस्कृतीला अनुभवण्यासाठी या महोत्सवात गावरान मेजवानीला तडका देण्याकरिता महिला बचतगटाचे स्टॉल सज्ज झाले आहेत.  

दि. २४ ते २८ फेब्रुवारी २०२३ दरम्यान बीड जिल्हा कृषी महोत्सव पार पडणार असून त्याची सुरुवात आज दुपारी मान्यवरांच्या हस्ते उद्घाटन झाल्यानंतर होणारआहे. बीड जिल्हा कृषी महोत्सव २०२३ च्या भव्य कार्यक्रम मंडपाचे आणि स्टॉलचे काम पूर्णत्वास आले आहे. या महोत्सवाचे या ऐतिहासिक बीड जिल्हा कृषी महोत्सवाचे साक्षिदार होण्यासाठी आणि आपल्या शेती तंत्रज्ञानाला विज्ञानाची जोड देण्यासाठी शेतकऱ्यांनी उपस्थिती लावण्याची गरज आहे. या महोत्सवात प्रगत शेतीच्या ज्ञान- तंत्रज्ञानासोबत अत्याधुनिक ड्रोन शेती यंत्राचे प्रात्यक्षिक तसेच ड्रोन शेतीचे महत्व, त्याचे फायदे या संदर्भात माहिती मिळणार आहे. विविध विकसित शेती औजारासोबत तज्ज्ञांचे मार्गदर्शन या महोत्सवात होणार आहे. विशेष करून बीडची अस्सल मराठमोळी गावरान जेवणाची चव देखील या महोत्सवात चाखायला मिळणार आहे. प्रथमच बीडच्या मराठमोळ्या खाद्यसंस्कृतीचा तडका बीडकरांना आणि इतर खवय्यांना अनुभवायला मिळणार असून बचतगटांच्या गावरान जेवणाची मेजवानी सुद्धा या ठिकाणी मिळणार आहे. लोप पावत चाललेल्या खाद्यसंस्कृतीला पुनर्जीवित करण्यासाठी कृषी विभागाच्या वतीने याचे आयोजन केले आहे.

या कृषी प्रदर्शन,पशु प्रदर्शन,परिसंवाद/ चर्चा सत्र, उत्पादक ते ग्राहक थेट विक्री व्यवस्था, शेतकरी सन्मान समारंभ, अत्याधुनिक कृषी अवजारे प्रदर्शन, शेतकरी उत्पादक कंपनी व सेंद्रिय शेती गट उत्पादित धान्य, फळे, फुले, भाजीपाला हे प्रदर्शनाचे मुख्य आकर्षण असणार आहे. या महोत्सवाला मोठ्या संख्येने शेतकरी बांधवानी उपस्थित राहण्याचे आवाहन जिल्हा अधीक्षक कृषी अधिकारी बाबासाहेब जेजुरीकर, आत्माचे प्रकल्पसंचालक सुभाष साळवे यांनी केले आहे.

चौकट

प्रदर्शनात जिभेला तृप्त करणारे पदार्थ

बीड जिल्ह्याच्या खाद्यसंस्कृतीचे एक विशेष म्हणजे पुरणपोळी. कोणत्याही मराठी सणावाराच्या वेळी घराघरात बनणारा पदार्थ म्हणजे पुरणपोळी. हा पदार्थ जितका दिसायला व खायला चांगला, तितका तो करायला कठीण. या संमेलनात पुरणपोळीसह, दही धपाटे, पिठलं- भाकरी, चुलीवरची जेवण इ. जिभेला तृप्त करणारे खाद्य पदार्थ प्रदर्शनाची विशेष मेजवानी आहे.

पेट्रोल डिझेलच्या कमी वितरणाबद्दलपाच पेट्रोल पंप धारकांवर खटला

 पेट्रोल डिझेलच्या कमी वितरणाबद्दलपाच पेट्रोल पंप धारकांवर खटला

संपूर्ण महाराष्ट्रात पेट्रोल पंप धारक व किरकोळ दूध विक्रेते यांची तपासणी मोहीम.

               मुंबई, दि. 22 : संपूर्ण महाराष्ट्रात पेट्रोल पंप धारक व किरकोळ दूध विक्रेत्यांची नियंत्रक, वैध मापन शास्त्र, महाराष्ट्र राज्य या विभागामार्फत तपासणी मोहिम पार पडली. या तपासणी दरम्यान ५७९ पेट्रोल पंपधारक व २५४ किरकोळ दूध विक्रेत्यांची तपासणी करून ०५ पेट्रोल पंप धारकांवर पेट्रोल डिझेलच्या कमी वितरणासाठी, तर २४ पेट्रोल पंप धारकांवर वजने मापे विहित मुदतीमध्ये पडताळणी व मुद्रांकन न केल्यामुळे खटले नोंदविण्यात आले. १७ पंप धारकांना वितरणात अनियमितता आढळून आल्याने संबंधित तपासणी अधिकाऱ्यांद्वारे परिशिष्ट १० प्रमाणे नोटीस बजावण्यात आल्या या त्रुटी सात दिवसांच्या आत पूर्तता करण्याचे निर्देश देण्यात आले.

               आवेष्टित दुधाबाबत एकूण २५४ आस्थापनांच्या तपासणी दरम्यान छापील किरकोळ विक्री किमतीपेक्षा (सर्व करांसहीत) अधिक दराने विक्री करणाऱ्या ३१ आस्थापनांवर वरील अधिनियम व नियमानुसार कारवाई करण्यात आली. तसेच सदर आस्थापनेद्वारा वापरात असलेले वजन व मापे विहित मुदतीत फेरपडताळणी व मुद्रांकन न केल्यामुळे तसेच इतर उल्लंघनाबाबत ७२ खटले नोंदविण्यात आले.संपूर्ण मोहिमेत वैध मापन शास्त्र अधिनियम, २००९ तसेच त्या अंतर्गत महाराष्ट्र वैध मापन शास्त्र (अंमलबजावणी) नियम, २०११ तसेच वैध मापन शास्त्र (आवेष्टित वस्तु) नियम, २०११ मधिल तरतुदींच्या उल्लंघनाबाबत एकूण १२५ खटले नोंदविण्यात आले.

        पेट्रोल व डिझेलच्या वाढते दर तसेच दुधाच्या वाढत्या किंमतीमुळे ग्राहकांची फसवणूक होण्याच्या तक्रारींमध्ये वाढ झाल्याने ग्राहक हितार्थ नियंत्रक, वैध मापन शास्त्र, महाराष्ट्र राज्य, तथा अपर पोलिस महासंचालक, डॉ. रवींद्र कुमार सिंगल यांच्या निर्देशाद्वारे संपूर्ण महाराष्ट्रात पेट्रोल पंप धारक व किरकोळ दूध विक्रेत्यांची विशेष तपासणी मोहीम राबविण्यात आली.

फसवणूक होवू नये यासाठी खबरदारी घ्यावी - डॉ. रवींद्र कुमार सिंगल

             ग्राहकांच्या हितार्थ ही मोहीम राबविण्यात आली असून व्यापाऱ्यांद्वारे ग्राहकांची फसवणूक होणार नाही. तसेच व्यापाऱ्यांकडून ग्राहकांची फसवणूक होऊ नये म्हणून ग्राहकांनी कोणतीही वस्तू, वजन अथवा मापाने खरेदी करीत असताना ते कमी दिले जात नाही ना याची दक्षता घ्यावी. प्रमाणित वजन व मापानेच वस्तू खरेदी करावी.

            आवेष्टित वस्तु छापील किरकोळ विक्री किमतीपेक्षा (सर्व करांसहीत) अधिक दराने विक्री करणे गुन्हा आहे. आवेष्टित वस्तूंवर वस्तूचे सामान्य नाव, उत्पादक/ आयतदार / आवेष्टक यांचे नाव व पत्ता, निव्वळ वजन/ माप, उत्पादित/ आवेष्टित / आयातीत केल्याचा महिना व वर्ष, किरकोळ विक्री किमत (सर्व करांसहीत). ग्राहक सेवा दूरध्वनी क्रमांक व ई-मेल इ. माहिती घोषित करणे बंधनकारक आहे. व्यापाऱ्यांकडून ग्राहकांची फसवणूक होत असल्यास, तशी तक्रार वैध मापन शास्त्र यंत्रणेच्या https://www.vaidhmapan.maharashtra.gov.in या संकेत स्थळावर करण्याचे आवाहन केलेले आहे.

एमबीए/एमएमएस सामाईक प्रवेश परीक्षेची ऑनलाईन नोंदणी सुरू.

 एमबीए/एमएमएस सामाईक प्रवेश परीक्षेची ऑनलाईन नोंदणी सुरू.

            मुंबई, दि. 22 : राज्य सामाईक प्रवेश परीक्षा कक्षामार्फत तंत्रशिक्षण विभागांतर्गत एमबीए/एमएमएस या सामाईक प्रवेश परीक्षेची ऑनलाईन नोंदणी प्रक्रिया दि. २३ फेब्रुवारी २०२३ पासून सुरू होणार आहे. ही नोंदणी प्रक्रिया दि. ४ मार्च २०२३ पर्यंत सुरू राहणार आहे.

            शैक्षणिक वर्ष २०२३-२४ करीता घेण्यात येणाऱ्या एमबीए/एमएमएस या व्यावसायिक पदव्युत्तर पदवी अभ्यासक्रमांच्या प्रवेशासाठी महा- एमबीए/एमएमएस सीईटी २०२३ ही परीक्षा दिनांक १८ मार्च २०२३ व १९ मार्च २०२३ रोजी घेण्यात येणार आहे. अधिक माहितीसाठी https://mbacet2023.mahacet.org या संकेतस्थळाला भेट द्यावी, असे आवाहन करण्यात आले आहे.

आईने मोजलेच नाही.

 *

आईने मोजलेच नाही...🤔* 

आयुष्याच्या तव्यावरती

संसाराची पोळी

भाजता भाजता

हाताला किती बसले चटके

*आईने मोजलेच नाही...🤔*

नवर्‍यासह लेकराबाळांचे 

करता करता

मोठ्यांचा मान राखता राखता

कितीदा वाकले गेले,

*आईने मोजलेच नाही...🤔*

बाळाला किती झोके

दिले,

बाळा साठी किती रात्री

जागले

*आईने मोजलेच नाही...🤔*

जरा चुकले की 

घरच्यांची,बाहेरच्यांची

किती बोलणी खाल्ली,

काळजाला किती घरं पडली,

*आईने मोजलेच नाही...🤔*

याच्यासाठी त्याच्यासाठी

आणखीही कुणासाठी

जगता जगता ,

स्वतःसाठी अशी 

किती जगले,

*आईने मोजलेच नाही...🤔*

पाखरे गेली फारच दूर

डोळा आहे श्रावणपूर

पैशाचा हा नुसता धूर

निसटून गेले कोणते सूर,

*आईने मोजलेच नाही...🙄*

🏵 *सर्व आईंना समर्पित...*🙏

नदी साक्षरतेविषयी 19 मार्चला मुंबईतभव्य नृत्यनाट्याचे आयोजन

 नदी साक्षरतेविषयी 19 मार्चला मुंबईतभव्य नृत्यनाट्याचे आयोजन.

            मुंबई, दि. 22 : प्रधानमंत्री नरेंद्र मोदी यांच्या "एक भारत श्रेष्ठ भारत" या संकल्पनेअंतर्गत ज्येष्ठ अभिनेत्री, नृत्यांगना तथा खासदार हेमा मालिनी पावन गंगानदीविषयी नृत्यनाट्याचे भव्य सादरीकरण मुंबईत करणार आहेत. सांस्कृतिक विभागाच्या संयुक्त विद्यमाने मुंबईतील एनसीपीए नाट्यगृहात 19 मार्च रोजी या भव्य नृत्यनाट्याचे आयोजन करण्यात आले आहे.

            खासदार हेमा मालिनी यांनी नुकतीच सांस्कृतिक कार्य मंत्री सुधीर मुनगंटीवार यांची सदिच्छा भेट घेतली, तेव्हा या कार्यक्रमाविषयी सविस्तर चर्चा करण्यात आली. यावेळी सांस्कृतिक कार्य विभागाचे प्रधान सचिव विकास खारगे आणि अन्य अधिकारी उपस्थित होते.

            मंत्री श्री. मुनगंटीवार यांच्या पुढाकाराने सुरू असलेल्या "चला जाणूया नदीला" या जलसाक्षरता उपक्रमाविषयीची माहिती खासदार हेमा मालिनी यांना यावेळी दिली गेली. "गंगा नदीविषयी आपले हे नृत्य - नाट्य देखील नदी साक्षरतेविषयी असल्याने ते ही या उपक्रमाचा भाग समजता येईल", असे हेमा मालिनी यावेळी म्हणाल्या.

            प्रधानमंत्री नरेंद्र मोदी यांच्या "एक भारत श्रेष्ठ भारत" या संकल्पनेअंतर्गत देशातील विविधतेतील सांस्कृतिक एकात्मता आणि भारतीय संस्कृतीतील श्रेष्ठ मूल्ये यांचे महत्त्व समाजासमोर पुन्हा एकदा अधोरेखित केले जाणार आहे. देशभरात सर्वत्र विविध कार्यक्रमांतून भारतीय संस्कृतीचे पैलू उजळले जातील.

००००

लोकराज्य’चा पौष्टिक तृणधान्य विशेषांक प्रकाशित

 लोकराज्य’चा पौष्टिक तृणधान्य विशेषांक प्रकाशित

मुंबई, दि. 22 : ‘आंतरराष्ट्रीय पौष्टिक तृणधान्य वर्ष’ म्हणून 2023 हे वर्ष साजरे होत आहे. या औचित्याने माहिती व जनसंपर्क महासंचालनालयातर्फे लोकराज्यच्या फेब्रुवारी 2023 महिन्याच्या ‘आंतरराष्ट्रीय पौष्टिक तृणधान्य वर्ष-2023’ या विशेषांकाचे प्रकाशन करण्यात आले.

तृणधान्ये मानवी आरोग्यासाठी महत्त्वाची असून ज्वारी, बाजरी आणि इतर भरड धान्यांची सर्वांगीण माहिती, महत्त्वाच्या पिकांची लागवड, विविध वाण, विविध खाद्यान्न, आहारातील महत्त्व, प्रक्रिया उद्योग, पौष्टिकता आणि भविष्यातील वाव, महाराष्ट्र मिलेट मिशन आदी विषयांवरील संशोधक आणि तज्ज्ञांचे अभ्यासपूर्ण लेख या अंकात समाविष्ट करण्यात आले आहेत. यासोबतच ‘पर्यटन विशेष’ हा स्वतंत्र विभाग समाविष्ठ केला असून त्यामध्ये महाराष्ट्रातील पर्यटन स्थळे, पर्यटन विभागाच्या योजना, याबरोबरच मंत्रिमंडळ निर्णयांची माहिती या अंकात देण्यात आली आहे.

हा अंक माहिती व जनसंपर्क महासंचालनालयाच्या https://dgipr.maharashtra.gov.in/ या संकेतस्थळावर तसेच https://mahasamvad.in/ या पोर्टलवर वाचनासाठी मोफत उपलब्ध आहे.

राज्यात पौष्टिक तृणधान्य पणन व मूल्यसाखळी कार्यक्रम राबविणार

- अपर मुख्य सचिव अनुप कुमार

        मुंबई, दि. 22 : आहारात ‍पौष्टिक तृणधान्यांचे (मिलेट) संतुलित प्रमाण व पर्यायी मिलेट उपलब्ध करून नवीन जीवनशैली विकसित करणे गरजेचे आहे. आंतरराष्ट्रीय पौष्टिक तृणधान्य वर्ष साजरे केले जात आहे. याचाच एक भाग म्हणून महाराष्ट्रात पौष्टिक तृणधान्य पणन व मूल्यसाखळी कार्यक्रम राबविण्यात येणार आहे, असे प्रतिपादन पणन विभागाचे अपर मुख्य सचिव अनुप कुमार यांनी केले.

            ‘अन्न सुरक्षेतून पोषण सुरक्षेकडे’ या आंतरराष्ट्रीय पौष्टिक तृणधान्य वर्ष 2023 अंतर्गत पणन विभागाच्यावतीने आयोजित केलेल्या ‘मिलेट विपणन आणि मुल्यसाखळी’ या राज्यस्तरीय परिषदेच्या उद्‌घाटन प्रसंगी श्री. अनुप कुमार बोलत होते.

           मुंबईतील यशवंतराव चव्हाण सेंटर, नरिमन पॉईंट येथे आयोजित केलेल्या ‘मिलेट महोत्सव’चे आज उद्‌घाटन करण्यात आले. यावेळी खासदार सुप्रिया सुळे, कौशल्य विकास, रोजगार उद्योजकता व नाविन्यता विभागाच्या प्रधान सचिव मनीषा वर्मा, पणन विभागाचे अपर मुख्य सचिव अनुप कुमार, कृषी विभागाचे प्रधान सचिव एकनाथ डवले, आहारतज्ज्ञ ऋजुता दिवेकर यांच्या हस्ते करण्यात आले. श्री. अनुप कुमार म्हणाले, “तृणधान्यांना भविष्यासाठी अन्नाचा पर्याय बनविणे ही काळाची गरज आहे. या पीकांच्या आरोग्यविषयक फायद्यांबाबत लोकांमध्ये जनजागृती करणे आणि आहार साखळीमध्ये मिलेटचे स्थान परत मिळवणे गरजेचे असून आहारातील मिलेटचे प्रमाण व पर्यायी मिलेट उपलब्ध करुन नवीन ग्राहकवर्ग तयार करणे हे उद्दिष्ट्ये आहे”, असे सांगून ‘मिलेटचे महत्व’ या विषयावर सादरीकरण करण्यात केले.

            कृषी विभागाचे प्रधान सचिव एकनाथ डवले म्हणाले, तृणधान्याला अधिक बाजारपेठ उपलब्ध करुन देणे आवश्यक आहे. तृणधान्य पिकाच्या उत्पन्न व उत्पादन वाढीमुळे शेतकऱ्यांना आणि ग्राहकांना फायदा होईल. तृणधान्य पिकाच्या क्षेत्रात मोठी घट झाली आहे. या पिकाचे घटते क्षेत्र व आहारातील महत्व लक्षात घेऊन तृणधान्यापासून तयार केलेले पोषक खाद्यपदार्थ उपलब्ध करुन देण्यासाठी देशांतर्गत आणि परदेशी बाजारातील मागणी वाढेल या दृष्टीने प्रयत्न करणे आवश्यक आहे.

            ऋजुता दिवेकर म्हणाल्या, “भारत हा जगातील पौष्टिक तृणधान्य पिकवणारा प्रमुख देश आहे. मिलेट खाद्यसंस्कृती आपली जुनी परंपरा आहे ती आपण जपली पाहिजे. सध्याच्या आहारातील मिलेटचे प्रमाण कमी झाले आहे, ते वाढविणे गरजेचे आहे. कमी दरात सहज उपलब्ध होणाऱ्या जंक फुडच्या ठिकाणी मिलेट फूड उपलब्ध झाले पाहिजेत. विमानतळ, रेल्वे, बसस्थानक या सारख्या ठिकाणीसुद्धा मिलेट फूड उपलब्ध झाले पाहिजे. त्यामुळे लोकांना आवड निर्माण होईल. मिलेट आहार हा आरोग्यासाठी अत्यंत महत्वाचा आहे, असे सांगून ज्वारी, बाजरी, नाचणी याचा आरोग्यासाठी कसा लाभ होतो हे त्यांनी यावेळी सांगितले.

            कार्यक्रमाची सुरुवात मान्यवरांच्या हस्ते दीपप्रज्वलन करुन राज्यगीताने करण्यात आली. दरम्यान अपर मुख्य सचिव अनुप कुमार यांनी संपादन केलेल्या ‘आपले तृणधान्य ओळखावे’ या पुस्तकाचे प्रकाशन मान्यवरांच्या हस्ते करण्यात आले.

            यावेळी पणन विभागाचे सह सचिव डॉ.सुग्रीव धपाटे, कृषी आयुक्तालयाचे सहसंचालक विनय आवटे, पणन महामंडळाचे सहसंचालक विनायक कोकरे, वखार महामंडळाचे सहव्यवस्थापक रमेश शिंगटे, मिलेट तज्ज्ञ सुनील कराड, मिलेट विपणन तज्ज्ञ निलम जोरावर, वरिष्ठ शास्त्रज्ञ सुरेश साखरे, मिलेट उद्योजक तात्यासाहेब फडतरे, महेश लोंढे व संबंधित अधिकारी, मिलेट उत्पादक, शेतकरी उत्पादन संस्था प्रतिनिधी यावेळी उपस्थित होते.

000

मागासवर्गीय विद्यार्थ्यांच्या नवीन वसतिगृह इमारतींचे

 मागासवर्गीय विद्यार्थ्यांच्या नवीन वसतिगृह इमारतींचे

मुख्यमंत्री एकनाथ शिंदे यांच्या हस्ते उद्घाटन.

            शिर्डी, दि. 22 :- सामाजिक न्याय व विशेष साहाय्य विभागाच्या लोणी येथील डॉ. बाबासाहेब आंबेडकर मागासवर्गीय मुला-मुलींच्या शासकीय वसतिगृहाच्या नवीन इमारतीचे उद्घाटन मुख्यमंत्री एकनाथ शिंदे यांच्या हस्ते लोणी येथे करण्यात आले. यावेळी मुख्यमंत्र्यांनी वसतिगृहाच्या नवीन इमारतीची उत्कृष्टपणे उभारणी केल्याबद्दल विशेष कौतुक केले.

            यावेळी महसूलमंत्री तथा जिल्ह्याचे पालकमंत्री राधाकृष्ण विखे पाटील, खासदार सदाशिव लोखंडे, खासदार डॉ. सुजय विखे-पाटील, समाजकल्याण आयुक्त डॉ. प्रशांत नारनवरे, जिल्हाधिकारी सिध्दाराम सालीमठ, सार्वजनिक बांधकाम विभागाचे अधीक्षक अभियंता जयंत कुलकर्णी, समाजकल्याण विभागाचे सहायक आयुक्त राधाकिसन देवढे आदी उपस्थित होते.

            यावेळी मुख्यमंत्री श्री. शिंदे यांनी दोन्ही वसतिगृहांच्या इमारतींची पाहणी केली‌. समाजकल्याण आयुक्त डॉ. नारनवरे यांनी मुख्यमंत्र्यांना या वसतिगृह इमारतींची वैशिष्ट्ये सांगितली‌. मौजे हसनापूर शिवारात मुला-मुलींच्या वसतिगृहाच्या दोन्ही नवीन इमारती उभारण्यात आल्या आहेत. प्रत्येकी २ एकर असे ४ एकरांवर ५४ हजार चौरस फूट बांधकाम करण्यात आले आहे. तळमजल्यासह तीन मजल्यांची सुसज्ज, सुविधायुक्त इमारत बांधण्यात आली आहे. मुलांच्या वसतिगृहासाठी १० कोटी ६५ लाख व मुलींच्या वसतिगृहासाठी १० कोटी ५९ लाख रुपये निधी खर्च करण्यात आला आहे, अशी माहिती आयुक्त श्री.नारनवरे यांनी यावेळी दिली.

००००