भारतरत्न डॉ. बाबासाहेब आंबेडकर जयंतीनिमित्त
१३ व १४ एप्रिल २०२६ रोजी टूर सर्कीटचे आयोजन
-पर्यटन मंत्री शंभूराज देसाई
· भारतरत्न डॉ. बाबासाहेब आंबेडकर जयंतीनिमित्त पर्यटन विभागाचा उपक्रम
· पर्यटक, नागरिक, विद्यार्थ्यांनी या उपक्रमामध्ये सहभागी होण्याचे आवाहन
मुंबई, दि. १०: पर्यटन विभागामार्फत भारतरत्न डॉ. बाबासाहेब आंबेडकर यांच्या जयंतीचे औचित्य साधून १३ व १४ एप्रिल २०२६ रोजी डॉ. बाबासाहेब आंबेडकर टूर सर्कीट सहलीचे आयोजन करण्यात आले आहे. मुंबई, नाशिक आणि नागपूर येथे भेट देणारे पर्यटक तसेच अनुयायींसाठी ही सहल निःशुल्क आहे. भारतरत्न डॉ. बाबासाहेब आंबेडकरांचे कार्य, जीवनचरित्र, विचार पर्यटक तसेच नव्या पिढीपर्यंत पोहोचवणे हा या टूर सर्कीट सहलीचा मुख्य उद्देश आहे. “भारतरत्न डॉ. बाबासाहेब आंबेडकर यांच्या स्मृतींनी पावन झालेल्या मुंबई, नाशिक आणि नागपूरमधील स्थळांना भेट देणे, हा केवळ एक प्रवास नसून त्यांचा समृद्ध वारसा जवळून अनुभवायची सुवर्ण संधी आहे. या उपक्रमामुळे सांस्कृतिक आणि ऐतिहासिक पर्यटनालाही चालना मिळेल. पर्यटक, नागरिक, विद्यार्थ्यांनी मोठ्या प्रमाणात या उपक्रमामध्ये सहभागी व्हावे, असे आवाहन पर्यटन मंत्री शंभूराज देसाई यांनी केले आहे.
No comments:
Post a Comment