महाराष्ट्र चेंबर ऑफ कॉमर्स, इंडस्ट्री अँण्ड अँग्रिकल्चर व जीतोतर्फे ‘जीतो कनेक्ट पुणे ’मध्ये ७ मे २०२२ रोजी 'राष्ट्रीय व्यापार महापरिषद'

--------------------------------

व्यापार धोरण, भविष्यातील संधी यासंबंधी चर्चा होणा

केंद्रीय माहिती प्रसारणमंत्री अनुराग ठाकूर, अमिताभ कांत व अशोक दलवाई मार्गदर्शन करणार.

मुंबई : महाराष्ट्र चेंबर ऑफ कॉमर्स, इंडस्ट्री अ‍ॅण्ड अँग्रिकल्चर व जीतो यांच्या संयुक्त विद्यमाने पुणे येथे आयोजित जीतो कनेक्ट 2022 आंतरराष्ट्रीय परिषद व ट्रेड फेअरमध्ये 'बिझनेक्स्ट' या 'राष्ट्रीय व्यापार महापरिषदेचे' आयोजन करण्यात आल्याची माहिती महाराष्ट्र चेंबरचे अध्यक्ष ललित गांधी यांनी दिली.

आंतरराष्ट्रीय परिषदेच्या दुसऱ्या दिवशी ७ मे २०२२रोजी ही राष्ट्रीय व्यापार परिषद होणार असून यासाठी केंद्रीय माहिती व प्रसारणमंत्री अनुराग ठाकूर, नीती आयोगाचे सीईओ अमिताभ कांत व भारत सरकारच्या 'राष्ट्रीय पर्जन्य क्षेत्र प्राधिकरण' चे सीईओ अशोक दलवाई उपस्थित राहणार आहेत.

जीतो, महाराष्ट्र चेंबर ऑफ कॉमर्स, इंडस्ट्री अँड अँग्रिकल्चर यांच्या वतीने व दि पूना मर्चंट्स चेंबर आणि पुणे व्यापारी महासंघ यांच्या संयुक्त विद्यमाने या परिषदेचे आयोजन करण्यात आले आहे. ही महापरिषद शनिवारी दि. ७ मे २०२२ दुपारी 3.30 वाजता होणार आहे, अशी माहितीही महाराष्ट्र चेंबर ऑफ कॉमर्स चे अध्यक्ष ललित गांधी, दि पूना मर्चंट्स चेंबरचे अध्यक्ष राजेंद्र बाठिया, पुणे व्यापारी महासंघाचे अध्यक्ष फत्तेचंद रांका यांनी दिली.

नीती आयोगाच्या माध्यमातून देशाचे धोरण निश्चितीचे काम होत असल्याने या परिषदेनिमित्त नीती आयोगाचे अमिताभ कांत यांची उपस्थिती महत्वपूर्ण ठरणार आहे. पुढील काळात देशाचे व्यापार धोरण कसे असेल हे त्यांच्याकडून समजण्यास मदत होणार आहे. त्याचबरोबर केंद्रीय माहिती व प्रसारणमंत्री अनुराग ठाकूर हे युवा नेते उपस्थित राहणार आहेत. देशाच्या राजकारणातील त्यांचे योगदान पाहता केंद्र सरकारची व्यापारासंबंधीची दिशा समजण्यास मदत होणार आहे. पंतप्रधान नरेंद्र मोदी यांनी जाहिर केलेले कृषी धोरण ठरविण्यामध्ये भारतीय प्रशासकीय अधिकारी अशोक दलवाई यांचे योगदान मोठे आहे. या परिषदेमध्ये कृषी आधारित उद्योगातील नवीन संधी संदर्भातही महत्वाची चर्चा होणार आहे असल्याची माहिती महाराष्ट्र चेंबरचे अध्यक्ष ललित गांधी यांनी दिली.

कोरोना काळात इतर क्षेत्राप्रमाणेच व्यापार क्षेत्राचेही मोठे नुकसान झाले आहे. जीतो कनेक्ट 2022 आंतरराष्ट्रीय परिषदेअंतर्गत होत असलेल्या 'बिझनेक्स्ट' राष्ट्रीय व्यापार महापरिषदेमध्ये व्यापार क्षेत्रातील भविष्यातील संधीविषयी सविस्तर चर्चा होणार आहे. पहिल्यांदाच व्यापार क्षेत्रातील चार मोठ्या संघटनांनी एकत्र येऊन अशा प्रकारची परिषद आयोजित केली आहे. या परिषदेसाठी महाराष्ट्रासह देशभरातील व्यापारी उपस्थित राहणार आहेत. शनिवारी होणारी ही परिषद सर्वांसाठी खुली आहे. मात्र, त्यासाठी नावनोंदणी करण्याची आवश्यकता असून जीतो कनेक्ट 2022 च्या संकेतस्थळावर जाऊन ही नावनोंदणी करता येईल, असे महेंद्र पितळीया यांनी सांगितले.