विमुक्त जाती भटक्या जमाती, इतर मागासवर्ग व विशेष मागास प्रवर्ग च्या युवक व युवतींकरीता मोटार वाहन चालक व वाहन प्रशिक्षण योजना

विमुक्त जाती भटक्या जमाती, इतर मागासवर्ग व विशेष मागास प्रवर्ग च्या युवक व युवतींकरीता मोटार वाहन चालक व वाहन प्रशिक्षण योजना राबविण्याबाबत.

महाराष्ट्र शासन

विमुक्त जाती भटक्या जमाती, इतर मागास वर्ग व विशेष मागास प्रवर्ग कल्याण विभाग

शासन निर्णय क्रमांक : मोवाप्र-२०१८/प्र.क्र.९३/विजाभज-१

विस्तार भवन, हुतात्मा राजगुरू चौक, मंत्रालय, मुंबई - ३२

दिनांक : ११ ऑक्टोबर, २०१८

प्रस्तावना :-

राज्यातील वाहनांची वाढणारी संख्या, वाहतूक व्यवस्था, रस्ते व दिवसेंदिवस लोकांचा पर्यटनाकडे वाढणारा कल लक्षात घेता, वाहन व्यवसायामध्ये रोजगाराची मोठया प्रमाणात संधी निर्माण होत आहे. तथापि, विजाभज, इमाव व विमाप्र समाजामध्ये शिक्षणाचे प्रमाण कमी असून त्याबरोबरच बेरोजगारीचे प्रमाणसुध्दा जास्त आहे. हे पाहता या बेरोजगारांना रोजगाराच्या संधी उपलब्ध व्हाव्यात व त्यांना कौशल्यपूर्ण प्रशिक्षण मिळावे, जेणेकरून त्यांना शाश्वत रोजगाराचे साधन उपलब्ध होऊन त्यांना स्थिर जीवन जगता यावे यासाठी विजाभज, इमाव व विमाप्र मधील युवक युवतींसाठी मोटार वाहन चालक व वाहक प्रशिक्षण देणे आवश्यक आहे.

उपरोक्त बाबी विचारात घेता विजाभज, इमाव व विमाप्र मधील युवक युवतींकरीता विजाभज, इमाव व विमाप्र कल्याण या विभागामार्फत मोटार वाहन चालक व वाहक प्रशिक्षण योजना राबविण्याचे शासनाच्या विचाराधीन होते.

शासन निर्णय :-

१-    विमुक्त जाती भटक्या जमाती, इतर मागासवर्ग व विशेष मागासप्रवर्ग यातील उमेदवारांना मोटार वाहन चालक व वाहक प्रशिक्षण योजना राबविण्यास या शासन निर्णयान्वये मान्यता देण्यात येत आहे.

२-    सदरहू योजनेच्या अटी व शर्ती, लाभार्थी निवडीचे निकष, अर्जाचा नमूना, बंधपत्र, करारनामा व इतर कागदपत्र इ. बाबी या शासन निर्णयासोबत जोडलेल्या परिशिष्ट “अ”, “ब”, “क”, “ड” आणि “इ” प्रमाणे राहतील.

३-    सदरहू योजना राबविण्यासाठी राज्यस्तरावर ई-निविदा प्रसिध्द करणे व तद्‌नुषंगिक पुढील सर्व कार्यवाही संचालक, विजाभज, इमाव व विमाप्र कल्याण संचालनालय, पुणे यांचे स्तरावरून करण्यात यावी.

४-    सदर योजना राबवितांना ई-निविदेद्वारे प्रत्येक प्रादेशिक विभाग स्तरावर एका संस्थेची निवड करून त्या संस्थेमार्फत सदरहू योजना राबविण्याची कार्यवाही करावी.

५-    संचालक, विजाभज, इमाव व विमाप्र कल्याण संचालनालय, पुणे यांचे स्तरावरून ई-निविदा प्रसिध्द करण्यासाठीचे विहित नमुन्याचे प्रपत्र “अ”, “ब”, “क”, “ड”, “इ” व “ई” सोबत जोडले आहेत.

६-    या योजनेंतर्गत प्रशिक्षण देण्यासाठी संस्थांची निवड ई-निविदा प्रक्रियेद्वारे करण्यात येईल. ई-निविदा प्रसिध्द करणे, ई-निविदा उघडणे, तांत्रिक बाबींची शहानिशा करणे व पात्र निविदा धारकांची माहिती संकलित करून व तुलनात्मक तक्ता तयार करून शासनास सादर करण्यासाठी संचालक, विजाभज, इमाव व विमाप्र कल्याण संचालनालय, पुणे यांना प्राधिकृत करण्यात येत आहे.

७-    प्रशिक्षणासाठी प्रशिक्षण संस्थांची अंतीम निवड करण्याचे अधिकार शासनाचे राहतील.

८-    यासठी सर्व सहायक आयुक्त, समाज कल्याण यांना आहरण व संवितरण अधिकारी म्हणून संचालक, विजाभज, इमाव व विमाप्र कल्याण संचालनालय, पुणे यांना नियंत्रक अधिकारी म्हणून घोषित करण्यात येत आहे.

९-    या योजनेवर होणारा खर्च लेखाशिर्ष “२२२५-अनुसूचित जाती, अनुसूचित जमाती, इतर मागासवर्ग व अपल्पसंख्यांक यांचे कल्याण, १०२-आर्थिक विकास, (०१) विमुक्त जाती, भटक्या जमाती, इतर मागासवर्ग व विशेष मागासप्रवर्ग यांचे कल्याण, (०१)(०१) संगणक, वाहन चालक, सैन्य व पोलिस भरती पूर्व प्रशिक्षण आणि राज्य केंद्र सरकारच्या स्पर्धा परीक्षा प्रशिक्षण (२२२५ई८०१)(कार्यक्रम)(दत्तमत)(मागणी क्र. झेडजी-३)” याखाली टाकण्यात येऊन मंजूर तरतुदीमधून भागविण्यात यावा.

१०-   सदर शासन निर्णय महाराष्ट्र शासनाच्या www.maharashtra.gov.in या संकेतस्थळावर उपलब्ध करण्यात आला असून त्याचा संकेतांक २०१८१०१२१७२१४९७९२२ असा आहे. हा आदेश डिजीटल स्वाक्षरीने साक्षांकित करून काढण्यात येत आहे.

महाराष्ट्राचे राज्यपाल यांच्या आदेशानुसार व नावाने.

(भा. र. गावित)

  सह सचिव, महाराष्ट्र शासन