टुरिंग टॉकीज व तंबूमधून ऐतिहासिक चित्रपट दाखवले जावेत

 टुरिंग टॉकीज व तंबूमधून ऐतिहासिक चित्रपट दाखवले जावेत

- सांस्‍कृतिक कार्य मंत्री सुधीर मुनगंटीवार

 

मुंबई, दि. २९ :-  राज्यातील टुरिंग टॉकीज व तंबूमधून ऐतिहासिक चित्रपट दाखवले जावेत. विविध शासकीय योजनांची माहिती तळागळातील जनतेपर्यंत पाहचविण्यासाठी या चित्रपट खेळांच्या दरम्यान शासकीय योजनांच्या जाहिरातींचीही प्रसिद्धी करावी. याबाबत विभागाने  तातडीने योग्य पावले उचलावी, अशा सूचना वने, सांस्‍कृतिक कार्य व मत्‍स्‍यव्‍यवसाय मंत्री सुधीर मुनगंटीवार यांनी आज दिल्या.

टुरिंग टॉकीज, तंबूतील सिनेमांचे जतन व पुनर्वसन यासंदर्भात वनमंत्री श्री. मुनगंटीवार यांनी मंत्रालयातील परिषद सभागृहात बैठक घेतली. बैठकीस सांस्कृतिक कार्य विभागाचे संचालक विभीषण चवरे, चित्रनगरीचे सह व्यवस्थापकीय संचालक संजय पाटील यांच्यासह टुरिंग टॉकीजचे मालक व प्रतिनिधी उपस्थित होते.

सांस्‍कृतिक कार्य मंत्री श्री. मुनगंटीवार म्हणाले की, टुरिंग टॉकीज व तंबूमधून ऐतिहासिक चित्रपट  दाखविल्यास थोर महापुरुषांचे विचार व कार्य घराघरात पोहोचेल. या चित्रपट खेळादरम्यान शासकीय योजनांच्या जाहिरातीही दाखविल्यास शासकीय योजना ही तळागाळापर्यंत पोहोचण्यास मदत होईल. जाहिरात प्रसारणामुळे टुरिंग टॉकीज व तंबू मालकांना आर्थिक बळकटीही मिळेल. टुरिंग टॉकीज व तंबू मालकांना देण्यात येणारे भांडवली अनुदान एक रक्कमी देण्याबाबत श्री. मुनगंटीवार यांनी सूचना केल्या.

०००००