गुड समेरिटन पुरस्कार योजनेच्या आढाव्यासाठी राज्यस्तरीय देखरेख समिती.

 गुड समेरिटन पुरस्कार योजनेच्या आढाव्यासाठी राज्यस्तरीय देखरेख समिती.

            मुंबई दि. २५ : केंद्र शासनाच्या रस्ते परिवहन व महामार्ग मंत्रालयाच्या मार्गदर्शनास अनुसरून मोटार वाहनांच्या जीवघेण्या अपघातात अपघातग्रस्त झालेल्या व्यक्तीस तत्काळ मदत करणाऱ्या आणि अपघाताच्या सुरुवातीच्या काही तासात अपघातग्रस्तांना हॉस्पिटल्स / ट्रॉमा केअर सेंटरमध्ये वैद्यकीय उपचारासाठी घेऊन जाणाऱ्या गुड समेरिटनला अपघातात बळी पडलेल्या व्यक्तीचे प्राण वाचविल्याबद्दल पुरस्कार देण्याच्या योजनेच्या योग्य अंमलबजावणीबाबत त्रैमासिक आढावा घेण्याकरिता राज्यस्तरीय देखरेख समितीची स्थापना गृह विभागाने शासन निर्णयाद्वारे केली आहे.

            या राज्यस्तरीय देखरेख समितीचे अध्यक्ष अपर मुख्य सचिव (गृह) असून या समितीमध्ये आयुक्त (आरोग्य सेवा ), प्रधान सचिव (विशेष/गृह), अपर पोलीस महासंचालक (वाहतूक) हे सदस्य आहेत. या समितीचे सदस्य सचिव परिवहन आयुक्त हे काम पाहतील.

            ही समिती या योजनेच्या प्रभावी व कार्यक्षम अंमलबजावणीचा दर तीन महिन्यांनी आढावा घेईल. तसेच राज्यातील तीन सर्वात योग्य नामांकन प्रस्ताव राष्ट्रीय पुरस्कारासाठी रस्ते परिवहन व महामार्ग मंत्रालयास सादर करेल. केंद्र शासनाने वेळोवेळी दिलेल्या मार्गदर्शक तत्वातील तरतुदीनुसार समितीचे कामकाज चालेल, असे शासन निर्णयात नमूद करण्यात आले आहे.