विधानपरिषदेच्या पदवीधर व शिक्षक मतदारसंघाच्या निवडणुका जाहीर

 विधानपरिषदेच्या पदवीधर व शिक्षक मतदारसंघाच्या निवडणुका जाहीर  

भारत निवडणूक आयोगाच्या 8 मे रोजीच्या प्रसिद्धीपत्रानुसार राज्यामध्ये महाराष्ट्र विधानपरिषदेचे मुंबई व कोकण विभाग असे दोन पदवीधर मतदार संघ आणि नाशिक विभाग व मुंबई असे दोन शिक्षक मतदार संघ याकरिता द्विवार्षिक निवडणूक घेण्यात येणार आहे.  या कार्यक्रमानुसार बुधवार, 15 मे रोजी अधिसूचना निर्गमित करणे,  नामनिर्देशनाची शेवटची तारीख 22 मे, नामनिर्देशन पत्राची छाननी 24 मे  रोजी होईल, उमेदवारी अर्ज मागे घेण्याचा अंतिम तारीख 27 मे अशी आहे. तर 10 जून रोजी सकाळ 8 ते दुपारी 4 वाजेपर्यंत मतदान घेण्यात येईल. तर 13 जून रोजी मतमोजणी करण्यात येईल.

तिसरा टप्पा:-

            तिसऱ्या टप्प्यातील कोकण विभागातील 02 आणि पुणे विभागातील 07 व औेरंगाबाद विभागातील 02 अशा एकूण 11 लोकसभा मतदारसंघात दि.07.05.2024 रोजी मतदान घेण्यात आलेले असून मतदानाच्या टक्केवारीबाबतची माहिती खालीलप्रमाणे आहे.

अ.क्र.	मतदार संघाचे नाव	पुरूष मतदार	मतदान केलेले पुरूष मतदार	महिला मतदार	मतदान केलेल्या महिला मतदार	तृतीयपंथी मतदार	मतदान केलेले तृतीयपंथी मतदार	एकूण मतदार टक्केवारी
1	32-रायगड	8,20,605	4,58,629 (55.89%)	8,47,763	4,67,561 (55.15%)	04	00 (00.00%)	55.51%
2	35-बारामती	12,41,945	7,74,383 (62.35%)	1130607	6,37,219 (56.36%)	116	19 (16.38%)	59.50%
3	40-धाराशीव (उस्मानाबाद)	10,52,096	6,90,533 (65.63%)	9,40,560	5,82,416 (61.92%)	81	20 (24.69%)	63.88%
4	41-लातूर	10,35,376	6,64,630 (64.19%)	9,41,605	5,72,700 (60.82%)	61	25 (40.98%)	62.59%
5	42-सोलापुर	10,41,470	6,45,015 (61.93%)	9,88,450	5,56,515 (56.30%)	199	56 (28.14%)	59.19%
6	43-माढा	10,35,678	6,90,054 (66.63%)	9,55,706	5,77,446 (60.42%)	70	30 (42.86%)	63.65%
7	44-सांगली	9,53,024	6,22,054 (65.27%)	9,15,026	5,41,267 (59.15%)	124	32 (25.81%)	62.27%
8	45-सातारा	9,59,017	6,22,414 (64.90%)	9,30,647	5,69,432 (61.19%)	76	23 (30.26%)	63.07%
9	46-रत्नागिरी-सिंधुदुर्ग	7,14,945	4,59,104 (64.21%)	7,36,673	4,48,513 (60.51%)	12	01 (09.09%)	62.52%
10	47-कोल्हापुर	9,84,734	7,24,734 (73.60%)	9,51,578	6,61,457 (69.51%)	91	39 (42.86%)	71.59%
11	48-हातकणंगले	9,25,851	6,78,590 (73.15%)	8,88,331	6,11,453 (68.72%)	95	30 (57.78%)	71.11%

 

 

 

चौथा टप्पा:-

चौथ्या टप्प्यात 01 नंदुरबार, 03 जळगाव, 04 रावेर, 18 जालना, 19 औरंगाबाद, 33 मावळ, 34 पुणे, 36 शिरूर, 37 अहमदनगर, 38 शिर्डी व 39 बीड अशा एकूण 11 लोकसभा मतदारसंघामध्ये दिनांक 13 मे 2024 रोजी मतदान घेण्यात येणार आहे.   त्याबाबतची सविस्तर माहिती खालीलप्रमाणे आहे.

अ.क्र.

मतदानासाठी यंत्रणा सज्ज; मतदारांनी उत्स्फूर्तपणे मतदान करावे

 मतदानासाठी यंत्रणा सज्ज;

मतदारांनी उत्स्फूर्तपणे मतदान करावे

- मुख्य निवडणूक अधिकारी तथा प्रधान सचिव एस. चोक्कलिंगम

·        चौथ्या टप्प्यासाठी  13 मे रोजी मतदान ; 23 हजार 284 मतदान केंद्र

·        सुमारे 2 कोटी 28 लाखांपेक्षा जास्त मतदार ; यंत्रणा संपूर्ण तयारीसह सज्ज

·        तिसऱ्या टप्प्यात सरासरी 63.55 टक्के मतदान

·        विधानपरिषदेच्या पदवीधर व शिक्षक मतदारसंघाच्या निवडणूका जाहीर                   

मुंबई, दि. 10 : राज्यात लोकसभा सार्वत्रिक निवडणुकीच्या चौथ्या टप्प्यातील अकरा मतदार संघासाठी 13 मे रोजी मतदान होत असून असून निवडणूक यंत्रणा सज्ज आहे. त्यासाठी प्रत्यक्ष निवडणूककरिता लागणारे साहित्य, साधनसामुग्री मतदान केंद्रावर पुरविण्यात आलेली आहे. मतदारांनी उत्स्फूर्तपणे मतदान करावे, असे आवाहन मुख्य निवडणूक अधिकारी तथा प्रधान सचिव एस. चोक्कलिंगम यांनी केले.

            मंत्रालयात आयोजित पत्रकार परिषदेत श्री. चोक्कलिंगम बोलत होते. यावेळी अतिरिक्त मुख्य निवडणूक अधिकारी डॉ. किरण कुलकर्णी उपस्थित होते.

            यावेळी माहिती देताना श्री. चोक्कलिंगम म्हणाले, तिसऱ्या टप्प्यात रायगड, बारामती, धाराशीव (उस्मानाबाद), लातूर, सोलापूर, माढा, सांगली, सातारा, रत्नागिरी-सिंधुदुर्ग, कोल्हापूर आणि हातकणंगले या अकरा मतदारसंघात 7 मे रोजी मतदान घेण्यात आले. तिसऱ्या टप्पात एकूण सरासरी 63.55 टक्के मतदान झाले.

            चौथ्या टप्प्यात नंदुरबार, जळगाव, रावेर, जालना, औरंगाबाद, मावळ, पुणे, शिरुर, अहमदनगर, शिर्डी आणि बीड अशा अकरा मतदारसंघामध्ये 13 मे रोजी मतदान घेण्यात येणार आहे.

             यासाठी एकूण २३ हजार २८४ मतदान केंद्रांची सुविधा उपलब्ध करुन देण्यात आली असून या निवडणुकीत २ कोटी २८ लाख १ हजार १५१ मतदार आपला मतदानाचा हक्क बजावणार आहे. या अकरा मतदार संघासाठी बॅलेट युनिट (बीयु) ५३,९५९ तर कंट्रोल युनिट (सीयु) २३,२८४ आणि २३,२८४ व्हीव्हीपॅट उपलब्ध असून चौथ्या टप्प्यात एकूण २९८ उमेदवार निवडणूक लढविणार असल्याची माहिती त्यांनी दिली.

            85 वर्षापेक्षा जास्त वय असलेल्या मतदारांना तसेच दिव्यांग मतदारांना त्यांच्या इच्छेनुसार गृह मतदानाची सुविधा उपलब्ध करून देण्यात आली आहे. दिव्यांग मतदारांसाठी मतदान केंद्राच्या ठिकाणी रॅम्पची व व्हिलचेअरची सुविधा उपलब्ध करुन देण्यात आली आहे.

            मतदान संपण्याच्या वेळेच्या 48 तास आधी अकराही लोकसभा मतदार संघामध्ये सायलन्स पिरियड (Silence Period) आहे. या लोकसभा क्षेत्रामध्ये 48 तास आधी प्रचार करता येत नाही. तसेच या मतदार संघातील रहिवासी नसलेली व्यक्ती राजकीय प्रचारासाठी या क्षेत्रात राहू शकत नाही, असे आयोगाचे निर्देश आहेत

प्रतिबंधात्मक कारवाई

           राज्यात एकूण 78 हजार 460 शस्त्र परवाने वितरीत करण्यात आली आहेत. त्यापैकी निवडणूक काळात कायदा व सुव्यवस्थांतर्गत 9 मे पर्यंत 50,831 शस्रास्रे जमा करण्यात आलेली आहे.  परवाने रद्द करून 1,132 शस्रे जप्त करण्यात आलेली  आहेत. जप्त करण्यात आलेली अवैध शस्रास्रे 1,851  इतकी आहेत. राज्यात आचारसंहिता लागू झाल्यापासून सीआरपीसी (CRPC) कायद्यांतर्गत 1,22,834 जणांवर प्रतिबंधात्मक कारवाई करण्यात आली आहे.  राज्यामध्ये दि. 1 मार्च ते 9 मे  2024 या कालावधीत राज्यातील केंद्र शासनाच्या व राज्य शासनाच्या विविध अंमलबजावणी यंत्रणांद्वारे 59.29 कोटी रोख रक्कम तर 45.72 कोटी रुपयांची दारु जप्त करण्यात आली. मौल्यवान धातू 162.40 कोटी रुपये, ड्रग्ज 244.59 कोटी, फ्रिबीज ०.४७ कोटी आणि इतर बाब अंतर्गत १०१.६६ कोटी रुपये अशा एकूण ६१४.१४ कोटी रक्कमेचा मुद्देमाल जप्त करण्यात आला आहे.

 

 

४१,१३४ तक्रारी निकाली

               16 मार्च ते 9 मे 2024 या कालावधीत राज्यभरात सी व्हिजील ॲपवर आचारसंहिता भंगाबाबतच्या ५४३३ तक्रारी प्राप्त झाल्या असून त्यातील ५४१५ तक्रारी निकाली काढण्यात आलेल्या आहेत. तसेच याकालावधीत एनजीएसपी पोर्टलवरील ४१,९६५ तक्रारीपैकी ४१,१३४ निकाली काढण्यात आलेल्या आहेत.

          माध्यम देखरेख व संनियत्रण समितीमार्फत जाहिरातीच्या पूर्वप्रमाणीकरणासाठी नोंदणीकृत राजकीय पक्षांकडून प्राप्त झालेल्या अर्जाच्या अनुषंगाने 236 प्रमाणपत्रे देण्यात आलेली आहे.

मुंबई शहर जिल्ह्यातील दोन्ही लोकसभा मतदारसंघातील उमेदवारांच्या दैनंदिन खर्चाचा हिशोब तपासणीसाठी वेळापत्रक जाहीर

 मुंबई शहर जिल्ह्यातील दोन्ही लोकसभा मतदारसंघातील उमेदवारांच्या दैनंदिन खर्चाचा हिशोब तपासणीसाठी वेळापत्रक जाहीर

            मुंबई, दि. 10 :- लोकसभा सार्वत्रिक निवडणूक-२०२४ साठी मुंबई शहर जिल्ह्यातील '30-मुंबई दक्षिण मध्य व '३१-मुंबई दक्षिण' या दोन्ही लोकसभा मतदारसंघातील उमेदवारांच्या खर्च तपासणीचे वेळापत्रक जाहीर करण्यात आले असून उमेदवार,प्रतिनिधींनी वेळापत्रकानुसार विहित दिवशी व वेळेला उपस्थित राहण्याचे आवाहन करण्यात आले आहे. दरम्यान, दोन्ही लोकसभा मतदारसंघातील उमेदवारांच्या खर्चाची पहिली तपासणी 09 मे रोजी झाली आहे.

          भारत निवडणूक आयोगाच्या निवडणूक खर्च संनियत्रण नियमावलीतील भाग बी 1 व भारत निवडणूक आयोगाच्या 18 फेब्रुवारी 2019 च्या पत्रानुसार खर्च निरीक्षकांनी दैनंदिन खर्चाचा हिशोब तीन वेळा तपासावयाचा आहे. '30- मुंबई दक्षिण मध्य' लोकसभा मतदारसंघासाठी केंद्रीय निवडणूक खर्च निरीक्षक म्हणून रविंदर सिंधू यांची तर '31 - मुंबई दक्षिण' लोकसभा मतदारसंघासाठी केंद्रीय निवडणूक खर्च निरीक्षक म्हणून मुकेश जैन काम बघत आहेत.         

       *दोन्ही लोकसभा मतदारसंघाच्या खर्च निरीक्षकांनी उमेदवारांचा खर्च तपासणीचे वेळापत्रक पुढीलप्रमाणे आहे*. 

*खर्च तपासणीसाठी तारीख* :- 1) दि.१३ मे २०२४ २) दि. १९ मे २०२४, *तपासणीचे ठिकाण* :- सह्याद्री अतिथीगृह, बाळासाहेब खेर रोड, कृष्णराज सोसायटी, वाळकेश्वर, मलबार हिल, मुंबई, महाराष्ट्र ४००००६. *तपासणीची वेळ* :- दुपारी ०२.०० वाजता     

         उमेदवार,प्रतिनिधींनी सर्व प्रकारच्या नोंदवह्या जसे की, दैनंदिन खर्च नोंदवही, रोख नोंदवही, बँक नोंदवही, संबंधित प्रमाणके,देयके (खर्चाच्या पावत्या), बँक पासबुक व इतर सर्व मूळ कागदपत्रांसह वरील नमूद ठिकाणी व दिनांकास विहीत वेळेत उपस्थित राहण्याबाबत जाहीर आवाहन करण्यात येत आहे. याप्रमाणेवरी नमूद दिनांकास उपस्थित राहण्याबाबत उमेदवारांना ई-मेलव्दारेही लेखी सूचना देण्यात आल्या आहेत. तसेच या वेळापत्रकात काही अपरिहार्य कारणांमुळे बदल झाल्यास तसे दूरध्वनी,ई-मेलने कळविण्यात येईल, असे '30-मुंबई दक्षिण मध्य' लोकसभा मतदारसंघाचे निवडणूक निर्णय अधिकारी विकास पानसरे व '31-मुंबई दक्षिण' लोकसभा मंतदारसंघाचे निवडणूक निर्णय अधिकारी रवि कटकधोंड यांनी सांगितले. खर्चाच्या अंतिम लेख्यासंदर्भातील त्रुटींचे निराकरण करण्यासाठी विशेष समितीदेखील मुंबई शहर जिल्हाधिकारी तथा जिल्हा निवडणूक अधिकारी संजय यादव यांच्या निर्देशानुसार स्थापन करण्यात आली आहे.

मुंबई शहर जिल्ह्यातील लोकसभा मतदारसंघांतील कामकाजाची निवडणूक आयोगाच्या सचिवांनी केली पाहणी

 मुंबई शहर जिल्ह्यातील लोकसभा मतदारसंघांतील कामकाजाची निवडणूक आयोगाच्या सचिवांनी केली पाहणी

            मुंबई, दि. 10  :- लोकसभा सार्वत्रिक निवडणूक-2024 च्या अनुषंगाने मुंबई शहर जिल्ह्यातील 'मुंबई दक्षिण' व 'मुंबई दक्षिण मध्य' या दोन्ही लोकसभा मतदारसंघात सुरू असलेल्या निवडणूक विषयक कामकाजाची आज  भारत निवडणूक आयोगाचे सचिव सुमन कुमार दास व अवर सचिव अनिल कुमार यांनी पाहणी केली.

        मुंबई शहर जिल्ह्यातील दोन्ही लोकसभा मतदारसंघात  20 मे,2024 रोजी सकाळी 7 ते सायंकाळी 6 वाजेपर्यंत मतदान होणार आहे. याच पार्श्वभूमीवर मुंबई शहर जिल्ह्यातील दोन्ही लोकसभा मतदारसंघांमध्ये मतदान केंद्रांवर तयारीला वेग आला आहे.

       मुंबई दक्षिण मध्य लोकसभा मतदारसंघातील माहीम विधानसभा मतदारसंघांतर्गत येणाऱ्या 26 मतदान केंद्रांना श्री. दास व श्री. कुमार यांनी भेट देऊन पाहणी केली. या मतदान केंद्रांवर मतदानाच्या दिवशी मतदारांना देण्यात येणाऱ्या सोयी सुविधा, सुरक्षा व्यवस्था, मंडप व्यवस्था याबाबत माहीम विधानसभा मतदारसंघाचे सहाय्यक निवडणूक निर्णय अधिकारी प्रशांत पानवेकर यांनी माहिती दिली.

000